歌詞/全文

1.
六舍（引）： 世上傳世要識機，勸人莫作反悔遲。人心險想腹中劍，暗箭難防局上棋。
2.
六舍（白）： 哈、想我六舍、當前大富好額、有厝無人立、米粟無人食、錢銀歸間閉厝瓦、誰知今日、變甲只欵、暝日三噹倚人門邊份食、出門是甲人無坐無立、噯呀、安人仔。
3.
卓氏（白）： 哭父呀、叫呷怨祖媽個嘈心。
4.
六舍（白）： 哈、人講飫鷄不惜提、飫人無惜面皮、今恁嗎𤆬我來去、共人份看有一碗稀粥。
5.
卓氏（白）： 噯呀、廣甲汝一个青瞑仔早死、真正無天理、害阮母仔子、去乎人噠甲死、只馬治塊饑荒無米、阮母仔子、分食到無歡喜、那有著甲汝一个青瞑早死、做汝去閉嘴齒祥、磨嘴齒、春个雞屎鄙。
6.
六舍（白）： 噯呀、天吓。
7.
六舍（唱）： 六舍青慘想著子，安人不份牽我行。一碗乎我渡性命，免我餓死保名聲。
8.
卓氏（白）： 好々、汝按哖強々下食、爭頭蛤額、只馬來去隨人份、隨人个額、著愛阮母仔子食春吓、即有通乎汝青瞑猴食。
9.
六舍（白）： 哈、總是汝母子、日晭金々、看我塊餓、那是不過心、掩粥仔一碗乎我飲、也是無、嗎是怪、我自己無恨心。
10.
象兒（白）： 老父仔、我奉汝去行、汝自己來去共人份恰營、也無、獨个講阮母仔子、呆心肝、烏腸肚、卜死著初一十五、共阮圍勸个車街路、石頭鼓親象塊落雨、講卜共阮貢死乎狗哺。