歌詞/全文

旁白：麻雀的笑話第二段。
東西南北坐了後，莊官是起手來欲沿溝，毋免輸了即計較，即袂嚷到亂操操。
莊官一子（jí）拍落海，第二个一支都掀起來。一个一子只輪都一擺，若有喊碰一下是到遮來。
單講西位的代誌，秋菊順紲今都夯兩支，一對烏西煞掀起，這雀穩贏免驚疑。
摃著烏西掀紅中，三台落濟蓋正常，三腳一棋都猴猴嚷，逐家毋倘予伊任務排中啦。
此款手氣上頂好，面清到搭免驚無，此坎白板拄一套，對對欲等五八索。
莊官五索拍落海，隨揀共伊夯來排。此擺恁敢遮總會害囉！我手內白板激暗台你知毋？
現時機運閣誠歹，唉……，有輸無贏毋倘轉來。抵著按呢上蓋害，此手共我鬥滿台。
繳若有贏是肉肉，今仔日輸繳當店咧行灶腳。欲拍麻雀都四搭，今仔日輸我減一腳。
請恁逐家小等待咧，我欲轉去值時來！厝內物件共看覓，桌頂有一對錫燭台。
房間棉被猶一領，包好是欲帶起行，驚予厝內人知影，外面弄揚（lōng-iông）歹名聲。
恬恬揹出四腳步走，走到當店汗那流，當店的人共我落（làu），你是啥貨遮大包？
我當掉三箍走出門，又閣輸了心頭酸。棉被若是無應當（tǹg），啊……，一眠寒kah袂得天光喔！
繳若欲會改過，四支釘層即會無啦！當今婊繳飼查某，此項規氣都毋倘學。
上好繳邊無應倚，即袂搥心都愛跋。正官若來順紲賴（lōa），掠去罰金規大拖。
親像此款遮呢害，無人教伊是做得來！此站到遮來交代，下日別款編出來。

*麻雀的笑話 (下)終
*臺史博知音分享會解讀、「開箱吧！臺史博館藏桌遊展」策展團隊校訂