歌詞/全文

旁白：Okeh唱片公司，麻雀的笑話頭段。
勸恁列位朋友哥，跋繳兩字毋倘學，你學袂來過先錯，予恁來贏是斷然無。
唉……，悽慘落魄為著繳，傢伙輸了是無詨潲，這官廳若知是欲掠去吊，二來莊官閣再蹤牢牢。
少年若無一擺戇，路邊哪有有應公？歹運了錢是毋免講，若無紲都帶悾悾。
當今麻雀上流行，內面棋子閣激八仙啦！東西南北都過省，真真激起閣有分明。
東位骰仔是拍十二，各腳夯了十六支，莊官加夯有一子，此个原來就是門牌支。
各腳有花都請補，若無是欲共拍落，莊官南位上蓋好，別人花仔攏總無。
今日手氣還是歹，逐位共看正骰西。流行麻雀是人人愛，紅中白板是大牌。
東西南北問牌子，計共一百足四支。著守大牌免講起，一樣各個有四支。
網仔內面刻字，掠做寫的都平平啦！五六七八二三四，有的普通的閣真值錢。
猶有白白無寫字，一款筒仔閣來刻圓圓，一支六筒誠成二字，撿有一支閣再叫飛支。
一行長長叫二索，欲尋飛支筒仔閣無，三科內底是上蓋好，不比目賊至尊無。
八支花仔分兩款，內面四季閣統完全，春夏秋冬咧婉轉，梅蘭菊竹紲結做一丸。
規局共恁講大概，無講恁嘛逐家知。此號麻雀上厲害，有的極媠閣紮出來。
一論真繳是毋倘學啦，一捙二穿三𨑨迌，學著此款上毋好，某子綴伊也都無。

*麻雀的笑話 (上)終
*臺史博知音分享會解讀，「開箱吧！臺史博館藏桌遊展」策展團隊校訂