(一)
這位兄台真標緻，予阮看著真佮意；in厝是無有妻兒，哎喲，想欲問伊驚嫌疑。
(二)
一尾鱸鰻蟯蟯趖，趖入洞內欲𨑨迌；等¬待鰻𣻸 (siûnn)甪 (lut)清楚，哎喲，趖出洞口軟荍荍。
(三)
有人講你真亂來，看著查某你著愛；這款查埔阮無愛，哎喲，毋通跤手亂亂來。
(四)
深山林內一條溝，溝中一粒紅石頭；千軍萬馬袂得到，哎喲，只驚一粒和尚頭。
(五)
一區水田毋播稻，留欲發草飼鰗鰡；鰗鰡飼大真利害，哎喲，半壁一空伊也知。
(六)
第一可憐阮一人，親像監獄關犯人；犯人關久也會放，哎喲，阮來可憐一世人。
(七)
一條手巾繡花草，無某阿君毋通交；等待某緣若是到，哎喲，斬草斷根無回頭。
(八)
二條手巾繡花欉，薄情阿君採花蜂；交著新的舊來放，哎喲，迎新棄舊毋是人。
(九)
三條手巾繡龍蝦，無情阿君少年家；僥雄的人無好尾，哎喲，毋通落人喙唇皮。
(十)
四條手巾繡金魚，阿君欲僥阮無疑；想起早情好情意，哎喲，初戀散步行港邊。
(十一)
五條手巾繡海岸，無情阿君毋通戀；一時欲僥情變款，哎喲，害阮心慒帶操煩。
(十二)
六條手巾繡花鳥，無疑阿君你來僥；滿腹苦情講袂了，哎喲，心頭怨氣怎會消。
(十三)
坐著火車欲轉去，一點五分到嘉義；咱無緣份來相見，哎喲，望君毋通暗傷悲。