歌詞/全文

老娼頭：吳樣汝哪好久無來𨑨迌，下昏暗哪這罕行？
海水：金環毋知有佇無？
老娼頭：有啦，今夜乎頭家罵，現時在房內哭，汝緊去看覓。
海水：金環，汝為著是麼欸大事，會哭甲這款的悲觀？無論啥物過不去的事誌，你通好對我講。
金環：下昏暗一陣的人客來點薰盤啦，講叫我佮伊跳舞，跤來手也來，我叫伊毋通伊就受氣啦，ＯＯＯＯＯ，頭家就欲拍欲揤。像我這款做人有啥物路用咧？父母將我的身軀來賣落花間，枉費我生成一副顏容。每次花選投票的時候得到了名聲，是加添我的淒慘、加添我的悲怨。在這罪惡萬端的場所，實是度日如年啊。
〔金環唱〕自古紅顏多薄命，滿懷珠淚苦在心，望咱永遠來做陣，今日敢會分雙形，滿腹悲願無人知，月老姻緣錯催排，枉咱一場的情愛，生從何去死何來。
海水：唉，金環，我勸你毋通過於悲觀，你對我的情份我是會知影。你在這个煙花的場所佇咧受苦，度日如年，我豈毋知？就是前日你我所約束的事誌，非是我無拍算來對妳失約，世間我的知心是妳一个人，妳對我這款的愛情我應當就早一日、緊一日救妳離開這个煙花，這是我為男子的義務。
金環！金環！我真對不起、我真對不住，就是現時我海水也是滿眼就是悲愁的環境，現時我是已經無能力通好贖妳的身軀啦，哈哈，世間會逼我行到這樣悲慘的環境，我也是已經相當有覺悟了，我不久就愛出發去旅行了。
金環：啊？你欲去叨位去旅行咧？毋知叨一日欲出發乎？
海水：啊，我這回的出發，就是永遠袂通好閣再倒轉來，永遠袂通好閣再見妳的面的旅行啦。
金環：吳樣，你敢有這樣的心肝，啊，阮金環也甘願綴你行啦。

〔運河奇案4完〕
*臺史博知音分享會參考歌詞單解讀整理