歌詞/全文

海水：金環、金環，妳出來毋知有人看抑無乎？
金環：無，無人看。阮遐的姐妹仔伴攏佇咧外面，這條暗路閣無人行，咱對這條來去啦。
海水：唉，這暫確就是運河矣，唉，下昏暗一輪明月已經遮著一片愁雲，天邊孤雁的聲音哭到這款的淒慘，啊，這个時候我的肝腸已經盡割斷啊。金環、金環！咱這世人袂當結婚，我最希望在黃泉，佮妳結成一對永遠的夫妻啦。
金環：親愛的吳樣，我真愛你、我真愛你。你看咧這片的江水，這就是……啊。世間做人的父母養大了囝兒，就該嫁乎人家，嫁著散赤的家庭也是我的命啦，怎樣會將我的身軀賣落花間，逼我來行這條路。
〔金環唱〕看見江水淚粼粼，今生所留是這時，怨恨無地通說去，我淚青天明月知。
〔海水唱〕你咱真情咧戀愛，最恨月老錯催排，環境來逼到這所在，甘心同死同窟埋。
金環：吳樣。
海水：金環，今咱兩人自下昏暗起，就會當永遠來做陣啦，今咱已經得到自由啦，金環。
金環：喂。
海水：妳攬好勢、妳攬好勢，啊罷了。
金環：唉。
口白：請問聽眾大家，對這對苦命的鴛鴦的結局，毋知有啥物款的感想？我想毋知有可憐抑無乎，我想這款可憐的人，咱大家著應當趕緊來設法，用相助相愛的方法，來防止這款的代誌，毋通再予伊閣再發生才好。

〔運河奇案6完*全劇終〕
*臺史博知音分享會參考歌詞單解讀整理