歌詞/全文

[旁白]：
這片就是愛情的悲劇，運河情死的實事，啊！可憐事，世間每每有多情的男女，雖然有真實的愛情，因為受著舊禮教的家庭來束縛，甚至受到金錢的支配，有的是為著環境的壓迫，袂當會達到最後的目的，若佮伊所愛的人，兩个人結成有美滿的夫妻，創造完滿的家庭。
最可嘆，世界上，有一位天真浪漫的女子，予人賣在煙花的所在，茫茫苦海終身來抱恨，然後佮伊所愛的人袂當好結婚，又感覺著人生的疼苦，生出厭世的念頭，想佮伊所愛的人，一對苦命的鴛鴦，相𤆬去情死，世界上到處就有這樣可憐的實事，劇中的金環佮海水，就是這樣的苦命的鴛鴦啦。

金環：唉，我因為家中貧寒，我的老母致病，無錢通好醫病。不得已將我的身軀賣落煙花，光陰似箭已有三年了。
我今年二十歲。想起我的前途非常的烏暗。我的今生毋知愛如何了局。看得別人養大了囝兒，有得嫁翁嫁婿，會得夫唱婦隨，享盡人生的幸福。
憑我這款的淒慘滿腹的苦嘆無人知影我，世間的人，啥物人會來可憐我咧？這大的世間，我雖有最愛最知心的人，吳海水這個人，現時亦是無好的機會啦，袂當救我跳出這苦海，唉，我想起來情也盡。
〔金環唱〕想起生成歹環境，最恨天公無公平。自古來紅顏多薄命，莫非我是命真窮。我身墜落煙花界，每日哀怨無人知，悲情哪會命這歹，想著目屎流出來。

〔運河奇案1完〕
*臺史博知音分享會參考歌詞單解讀整理