歌詞/全文

女：來哦！來看這第二文化館。入門兩个咧假生番，創佮活人是誠仝款哦！你看目睭鼻仔誠懸哦！
外客：唉啊…，番仔目睭激降降，看著實在有影會驚死人。唉唷，寧可來去看別項，生番若變面是真歹孔哦！
女：唉唷，袂啦！假--的，你哪遐驚死？苦境閣驚甲吐嘴舌？來去he國防的看新奇，也有彼號炸彈佮飛行機！
外客：哈哈，來看此項上第一有路用啦！內面閣猶有守備兵，唉唷，有的閣夯刀佮夯銃！緊走緊走，從按一下欲去出征咧？
女：毋是啦！這是存欲予人看仿！唉唷，你嘛毋通遐龜藏。無看都是尪仔創，通假的人穿軍裝啦！
外客：哈哈，假的實在有影都誠本領矣he，隨个妝起激誠成！唉唷…，害我驚一下險吐形，趕緊來去看別間啊！
女：唉唷，此演藝館內上趣味，內面閣有彼號藝旦咧獻技，欲看今都緊來去，一个講着三百錢。
外客：唉啊，入來去毋免論啦，兩个開都毋免一箍銀咧。單我共伊拍咧兩人份，賰的叫伊去買薰啦！（女：多謝！多謝！）
外客：哇…，內面佇咧跳舞。咱嘛來佮伊學跳咧ko！
女：哈哈！人我嘛有學跳舞，你知毋？唉唷，此幾步都愛揀珍珠，閣有彼號洋裝圓圓圓，我跳嘛袂比人較輸。
外客：唉，若kah是無洋裝咱都來去做，順紲我來去買皮鞋。會場內嘛有佇咧賣，知毋？抑我買一寡，共你小寡交陪咧ko！
女：唉唷，哥哥啊，予你買相送，多謝你上𠢕做人！做陣來去看別項，按呢你會藏水來此孔啦！
外客：按呢咱共伊看覓，罕得幾時即有來？此號外久即有一擺，有來無看實在不應該你知毋？
女：著啦！看遮鬧熱大福氣，開破咱無遐真！你看一下，海女誠𠢕閣會藏水覓，閣會落去鑽水咧掠金魚哦！
外客：唉咿…，實在有影都也誠本事哦，ho͘ⁿh！踮咧水底佇咧展工夫，鑽水閣鑽咧遐呢久？唉唷，敢佇咧掠寶佮摸珍珠咧？
女：哈哈！此粒珍珠摸起閣會滴，拍算此粒真濟錢。心肝我無愛別物，若有此粒我都暢規年哦！（外客：哈哈，敢有影咧？）（女：有，猶有這無？）
外客：抑若kah是講你合意，咱來共伊買ko。此套袂敢外下花哦，定價啥物一粒一百八，錢我提予伊你緊共提啦！
女：哈！此粒珍珠圓似雪，送我此粒上價值，你我都猶未相捌咧，你送我此粒，實在予你誠勞力。
外客：查某官！（女：喂！）
外客：你欲叨位去？咱過遐久矣？咱毋都欲做陣來去草山，做陣桂賓館來去順紲咱來去洗溫泉ko。
女：唉唷，阮毋哦！今仔日佮你規日行遮遠，行去腳骨都攏齊酸，草山明仔載即拍算！來去啦，來去阮厝歇o͘ⁿ-ni-khu。
外客：恁兜到底是踮佇叨一額？我嘛毋捌去，我都愛坐自動車ko。遮烏頭--的，遮無一隻？隨來哦，順紲做陣來恁遐ko。
女：好喏，你甲欲了錢動錢，今都順紲來佮伊假仙。若有此號大耳的共拖轉來搧，搧甲予你去拖屎連。會變得真衰憐，欲刣豬哥仙，了錢無體面，目睭翱漣漣。

*臺史博知音分享會解讀