歌詞/全文

女：夭壽矣！你是欲睏死去，抑毋緊起來？唉啊…無看見日頭照尻川？遮晚你也毋起床？下晝矣無趁着驗飯！抑看欲去叨一个，你嘛緊出門！
男：唉…，你毋*愛蹛遮咧哭爸哦！你敢毋知影我是軟腳蝦？也無氣力通相得（saⁿ-tit）矣，今你欲叫我創啥貨？
女：唉啊…，此馬人咧博覽會，外位的人是踢倒街，小寡奸技你嘛罔去做，加減去趁寡嘛即袂衰！
男：哼？唉？生理今是做袂動啦，家伙為妳了空空，抑今是望你鬥相仝哦，也袂去予月娘倩女工？
女：啊好！你kah欲叫我創頭路矣，逐家咱來去神明呼，即是袂使欲食醋，抑我來趁寡你孝孤。
男：哼…？唉咿…？我是叫你趁錢鬼哦，你欲叫我做烏龜哦？你免蹛遮放臭屁，恁父是無甲遐落蓑哦！
女：毋是啦！唉啊，我是共你講實在--的，此馬的公司，抑誰攏有來，火船火車是載規載，抑我欲騙寡通來開啦！
男：哦？你想講獻美人計，一擺有偌濟通好提？你都敢是去交著舊人客咧，恁父毋*愛來討蝨頭上爬哦！
女：做你安心免煩惱，逐家咱來講通和。抑若有彼號大耳的通剪做，趁兩、三錢銀仔免驚無。
男：好！好！好！若是有通遐飽肚，水粉做你緊去糊ko，妝予媠媠去散步，我即看你的手腕是偌粗啊？

女：來去！來去！哈哈！到遮都是公園口，出入的人閣亂抄抄。哦哉，彼个準是外位到，手裡即會捾皮包。哈哈！看甲頭殼閣向天栽。哦啊，那行閣那對我遮來！嘿嘿，我對頂頭下底共巡看覓，抑若是有影大耳的共牽來刣。
外客：哦啊，誠鬧熱！誠鬧熱！博覽會日本人遮濟，行甲相挨講咧共人相刮啦！啊好啊，逐家毋*愛按呢生刮矣！
女：唉唷？
外客：啊，失禮！失禮！失禮！無看見，煞去共你踏著鞋ko！
女：啊？袂！袂！袂！敢是你踏過袂失禮！毋知叫是叨一个？抑你是外位个人客？若踏閣較疼嘛無問題！
外客：哈哈，唉…這是我按呢顧行無顧看，毋即會去共妳踏著腳盤。害你踮遐捘看欲按怎樣都好？唉啊…，這也是真正無因端咧！
女：唉啊…，無要緊啦！踏著疼，是連鞭過，血流都也無破皮！人客，你蹛叨一塊？捾kah此个皮包遮大个？
外客：哦…，都是欲問我的所在，我蹛佇外仔呢遠啦？（女：是啦！）
外客：哦啊…，若kah講我彼个所在ho͘ⁿh，我蹛去足誠遠呢，路頭行起是比天猶較長哦！抑我欲先共你借問ko，你是蹛佇本街，抑是外庄的啊？
女：唉啊…，阮踮咧內山近番界，因為欲看博覽會即有來。想欲來去看會館內，欲對叨位仔閣無啥知！
外客：哦…，我嘛拄拄欲來去看，你知毋？抑無我煞來共妳拍單ko。（女：哪通按呢生？）
外客：逐家做陣較有伴，此張予你這查某官！
女：啊好喏，kah幫我拍一張者，今我都來順序觀，綴伊來去看會館。拍算此个敢袂寒酸？
外客：唉咿，此間我都真正看袂出哦！講啥物佇咧擺古錐，排排遮的啥物死人骨，看一寡死鳥是欲孤屈...

*臺史博知音分享會解讀