歌詞/全文

女：「哎唷，老仔啊，你今是欲照實講抑是欲共恁爸刁古董，自少年一直延，老短命仔你毋驚去予拖屎連乎？
大耳喔寬寬仔共恁爸搝(khiú)咧搧，用話寬寬仔共恁爸騙，今歲頭仔是五十外囉，你猶無見欲共阮娶，後日按呢是毋通去咒彼號接狗誓喔，一冬共恁爸騙過一冬。
阮算來也有想欲去嫁翁啦。親像彼年四十九恁爸就想欲嫁，好啊，閣你會共我展身勢喔，展文展武欲予我喝嫁外久，一直好喙叫我就毋通。
按呢一冬過一冬，啊你就無影跡，袂怪恁爸佇咧共你搤。通人乎，大大細細嫁甲遐好看，[恁爸]拄著你這咧佇咧共恁爸纏纏割割(tinn5-tinn5-kuah-kuah)。
今仔日你若毋講予明乎，盡規个來佇咧拍歹感情啦，聘金才欲挃(tī)你千五閣諞(pián)你無變步，大尾的查甫囝看欲佮人做啥物頭路，想著面就烏喔。」

男：「哈哈哈哈哈，你這个查某實在誠金蠅，啊你面隨時變啊？這个嫁娶就毋是佇咧耍喝，凊采嘛著兩千外。
我就有拍算阮小弟伊𥴊仔店就欲提兩千通來佮你應，𣛮頭七車khē-ki 蠟燭按呢逐項嘛著。猶連錢就提出來囥我毋就會曉通拍算，啊就拜託人看一个清氣的日子hah，啊就是看後個月十四喔，啊今你就緊發落代誌，看你啥物物件佮意你家己就緊去變，看欲外濟大餅欲用幾𣛮，阮就發落來送訂。」

女：「哎唷，敢誠實有影，上少嘛就四百個大餅、百二𣛮，人才會呵咾我好命。啊是毋通用彼个古早例，就攢自動車予我坐喔。
啊就做一領彼號âng-sáng來穿加外爾搡咧。也毋通ＯＯＯ，也毋免擔屎桶，彼毋就掠一個媒人毋才佮人毋相仝。」

男：「對對對對對對，按呢上妥當，媒人才會去掠彼號khiau-thuí嫂上蓋好，人伊也袂ＯＯ萬項代誌就知影。」

女：「按呢對對對，彼咧誠好勢，人伊誠gâuＯＯ你知影，絕對早起乎才叫伊較早來共咱煎茶，也通煮鹹麋，來發落毋才會整齊！」

男：「好啊，你這號三八查某七土八土，就毋是死人欲共人啥物相仝？人煮鹹麋是歹代誌妳實在是真三八氣啦。」

女：「按呢就對毋！啊人毋就代先發落食點心抑毋才siānn-thâu燒金，阿等候自動車若是來ho，咱兩个才行相排，啊通予人知人毋才會呵咾咱兩个老的囂俳！」

男：「對啦，才會是老囂俳啦，哈哈哈哈哈。」

〔女唱：雨夜花調〕

1.
欲嫁翁 欲嫁翁  一暝袂睏軁厝坊、  都是少年無拍算  才就共人無相仝。
2.
欲嫁翁 欲嫁翁  一日骨頭袂輕鬆、  為著婚禮無拍算  才來變成老大人。

（老新娘 終）

*臺史博知音分享會解讀