歌詞/全文

旁白：絞冬瓜二段。
男一：「你兄我弟啊！[喂~創啥貨啊] 咱的好朋友娶牽手，今仔日三日，新娘都欲出廳，咱都來去齴牙（giàng-gê），食一下新娘茶ko！」
男二：「[按呢生是毋] 新娘生媠真賢慧哦！咱逐家啊，若欲食茶也都講好話啊！」
男一：「按呢啊？[著啦] 好話是我上蓋濟，我講好有倘好出賣--無？」
男二：「按呢生，來去ko！」
男一：「哦，來去啊！[行哦]」
眾人：「哇…，逐家啊，來到位矣！[入來ko]」
女：「逐家啊，入來坐哦！」
男一：「哦…，坐…坐…恭喜賀喜！山貉（soaⁿ-hô）鳥鼠ho͘ⁿh！」
女：「唉唷？啥物恭喜、賀喜？啥物山貉鳥鼠？」
男一：「毋是啦！恭喜！賀喜！真歡喜啦！」
女：「唉唷，你毋就 khiūⁿ 予伊好，講予清楚！」
男一：「哦啊…，咱會使朋友弟兄來遮濟个，刁工欲來請新娘出來通捀茶ko！」
女：「有影--無？[著啦] 咱這朋友弟兄，都是欲請新娘出廳嗎？ [是啦] 好啦！內面啊！[喂] [喂] 春玉的啊，今趕緊共我燒金、放炮啊！[好啦] 好請新娘出廳哦！ [哦]」
~~（鬧廳八音）~~
女：「新娘啊，勻勻仔行哦！」
男一：「哦啊…，逐家啊！[喂] 新娘誠媠，來啊，都逐家硩（teh）茶甌！[好~好~好~]」
女：「今仔日新娘出房口，手捀茶盤佮茶甌。抑學禮數（lé-sò͘）學較無夠，逐家若無嫌請忍留（jún-lau）哦！」
男一：「哦啊…，禮數誠到！禮數誠到！新娘捀茶閣誠夠禮，生成真媠閣肉誠白，合婚夫妻得和齊，結成一對的好夫妻哦！」
女：「有影--無？𠢕講話！」
賓客A：「新娘生媠誠溫美，堪稱牡丹第一枝，合婚隨時知花喜（hoe-hí），夫妻富貴百百年。」
女：「哦啊…，猶閣較好！」
賓客B：「新娘生媠配好尪，予你請茶雙手捀，夫妻合婚相疼痛，代代富貴閣再出𠢕人。」
女：「哦啊…，猶閣較好！」
男一：「哦啊…，這新娘生媠閣誠豪派，入門錢銀按呢家己來，合婚夫妻閣相意愛，代代囝（káⁿ）孫都狀元才哦。」
女：「有影--無？[著啦！]」
女：「哦啊…，猶閣較好！禮數予恁用遮夠，感謝恁共阮硩茶甌，逐家合婚百年老，錢銀存款抵山頭哦！」
眾人：「逐家抵山頭哦！ [抵山頭哦~哈哈…]」
*絞冬瓜 (下)終
*臺史博知音分享會，依歌詞單解讀修訂