歌詞/全文

旁白：Okeh唱片公司，臺灣風俗絞冬瓜頭段。
眾人：「咱逐家啊！ [吆喝] 今仔日辛發財仔娶牽手，咱來去共絞冬瓜哦！[行哦~行哦~]哦啊！一下走、二下走，走來到辛發財仔的房間口矣！[入來去~~]」
女：「Eh？慢且是咧！恁逐家啊！ [Hâⁿ] 欲來創啥物貨？」
男一：「嘿嘿，欲來看新娘絞冬瓜！」
女：「按呢生啊？」[著啦] 新娘新新是袂䆀(bái)啦，囝婿緣投號做辛發財！[Eh] 來鬧洞房是好代！[哦] 若無四句你是毋倘來哦！」
其他：「唉唷？今都疼囉！新娘真勥腳，[這]種的（chióng--ê）閣害哦！種的（chióng--ê）我bè hiú liá（福州話：這個我不會）！『𠊎毋知哦』！（客語）」
男一：「予我！予我！予我！新格（kek）的房間閣新噹噹，新做眠床掛花窗，新娘生媠閣誠活動，拄好嫁著緣投尪啦！」
女：「唉唷，誠高才！入來坐，食冬瓜啦！」
男一：「好！坐！坐！坐！Eh？抑冬瓜閣一條寸外長，大禮閣荖葉加檳榔。洞房花燭是好下耍（hā-sńg），緊請伊新娘倘出眠床哦！」
女：「按呢生？[著啦~] 新娘在佇咧眠床內啦！[Eh] 親像盤古天未開！[唉唷] 此陣無閒咧伴尪婿！[哼~] 若有四句你都緊閣來哦！」
男一：「唉唷…，阮是都欲來請新娘，欲來絞冬瓜，無欲來佮你講好話ko！
女：「哦啊…，kah遐快？」
男一：「Eh？抑毋欲按怎？」
女：「哦啊…，隨便都欲請新娘絞冬瓜？[哼~] 來！我共你講！[哼~] 我做對予你對。對若會著免驚無啦！對若袂著，做你去山貓（soaⁿ-niau）想海貉{大老鼠}！」
男一：「有影--無？[ 有啦！] 哦…，看欲做啥物對？做你對來！」
女：「恬恬聽哦！[好~] 天會飛！[哦] 地會走 [按呢~] 廳裡好看！ [哦~] 房裡好用！」
男一：「按呢哦？[著啦~] 抑欲偌久予阮對啊？」
女：「讓（jiōng）你對三擺！」
男一：「哦，好好好！天會飛，這毋都黃鶯啦？地會走，閣猴閣夯燈！廳裡好看，八仙桌的時鐘！房裡好用，閣下kám仔花框。」
女：「無著哦，賰兩擺囉！」
男一：「毋著哦？哦…，閣再來！閣再來！天會飛都是花眉，地會走閣鸕鶿，廳裡好看是人釣魚，房裡好用閣皮箱蠓罩楣。」
女：「唉唷，夭壽！猶閣較毋著！[嘿嘿！] 賰一擺囉！」
男：「哦哦？天會飛是雁鳥，地會走㞓母鳥，廳裡好看閣人咧跋筊，房裡好用新娘公佮新娘婆都會曉。」
女：「夭壽哦！猶閣較毋著，出出去！」
男一：「慢且！你毋都對一下予阮聽咧！抑無敢有著，共阮講準無哦！」
女：「按呢生？ [著啦] 好啦！我對予你聽！[哦] 天會飛是像雲！[哼] 地會走是地球轉輪！[按呢] 廳裡好看是頂唇，房裡好用是新娘毋笑激含唇啦！」
男：「啊？著！著！著！甘願！按呢逐家轉來去啊！」
眾人：「唉唷，即閣來啦！[ 好！好！好！]」
*絞冬瓜 (上)
*臺史博知音分享會參考歌詞單解讀校訂。