歌詞/全文

囡仔抱來佇眠床 昨暝艱苦到天光 著緊攢予產婆轉 伊纏綴咱歸暝昏
紅包我攢八圓銀 較袂予人笑龜祟 小可節本永無論 著較捷來共阮巡
人著做好有補所 頭胎才能生查埔 雖然緊快袂艱苦 腹肚枵甲面欲烏
紅包八圓是無濟 產婆相辭就轉回 腌臢布仔倩人洗 規厨桔餅著去提
一塊桔餅做四周 硩腹人著煮麻油 紲參一杯舊紅酒 后日骨節才袂抽
麻油進前搭來囥 灶跤燒酒歸大缸 紲炒一碗麻油飯 著食面色才袂黃
只款毋才好尫婿 毋免我講遂項知 攢欲予我做月內 猶袂三日鷄免刣
桔餅炒飯捧到位 二項排排做一堆 呌娘較苦食幾喙 月內無食人袂肥
茶鈷貯衣捾去囥 鼎蓋過佇連只莊 汝攢桔餅佮炒飯 甘草猶袂買入門
甘草央人買百一 紲捧碗頭搭冬蜜 今日十月拄廿七 廿九通好做三日
（病子歌4 完）
*臺史博知音分享會解讀，參考歌仔冊《最新病子歌》(玉珍書局印製發行,1932 年 4 月印刷出版)