歌詞/全文

人人欣羨我好命 富貴毋值咱的名 人講這款敢有影 囝兒面形親像兄
燒金放炮在砛墘 油飯捧出去夆拈 門口的人圍滇滇 囡仔大小咧相爭
外口喊到嚇嚇叫 油飯咱熗十幾石 香菇蝦米參袂少 敢夆呵咾才有著
囡仔枵甲哀哀吼 有人𤲍甲鼻那流 一手一丸食無夠 走去𪜶厝捧碗頭
外口嚷甲嚇嚇趒 敢是囡仔拈袂著 我佇房間想愛笑 因何手底真正燒
有个規碗抔咧走 有人脫衫起來包 缺嘴跛跤攏來到 雄雄走甲相嗑頭
外口今是生怎樣 阿君入內通知娘 有个佇遐胚死脹 人咧笑伊那監囚
我閣出來共伊看覓 青盲曲龜也有來 攏食有著上佳哉 拍算五路攏齊知
今日我娘上歡喜 歡喜頭胎生男兒 甘草著較骨力飼 別日咱欲向望伊
青目無看搶上濟 人人食飽才轉回 土跤交落大四界 曲龜捧碗走來提

（病子歌6 完）
*臺史博知音分享會解讀，參考歌仔冊《最新病子歌》(玉珍書局印製發行,1932 年 4 月印刷出版)