歌詞/全文

咱囝大漢有福氣 免哥汝講也知機 我今著較小心飼 後日就有出頭時
日子一日一日到 二十四日攢剃頭 差人去買剃頭草 鴨卵通予厝邊兜
二十四日當即過 閣無幾工就滿月 看哥是欲做麵粿 抑是發落請人炊
親情五十遮爾濟 朋友姊妹有交陪 拍算粿著倩人做 彼年濟米誰欲挨
吩咐餅店做麵圓 通貺親情佮厝邊 賀禮來到窒窒滇 功夫予恁真正所費錢
我緊點灯佮結彩 咧做滿月人人知 親情五十歸厝內 逐个好意包禮來
親情五十來恭賀 上𠢕交陪就是哥 著三十塊的幼桌 小塊驚去坐袂落
二九鬧熱到初一 三十塊桌做兩日 按呢禮數敢袂失 磨甲初二才條直
二九無閒到初二 眾人呵咾我囝兒 歌仔到暫欲遮止 解悶娛樂好歌詩
到遮一暫正拄好 少音曲盤咧相褒 啥人心悶著煩惱 曲盤買去唱𨑨迌

（病子歌8 完）
*臺史博知音分享會解讀，參考歌仔冊《最新病子歌》(玉珍書局印製發行,1932 年 4 月印刷出版)