歌詞/全文

親情五十欲轉到 滿月著閣來𨑨迌 恁著斟酌行予好 我袂起來禮較無
逐家食甲喙油油 老人牢甲歸喙鬚 跛跤欲轉相牽手 眵目糊甲歸目睭
厝邊頭尾齊回返 今日介倒咱本庄 叫哥𥴊壺收來囥 賰寡油飯置籠床
食飽各人就起行 𥴊壺收來下大廳 問娘看覓較有影 咱囝欲號啥物名
人名講欲予阮號 驚袂合意我親哥 號做帶財好不好 有嫌歹名抑是無
娘仔真正有腹內 囝名欲號做我帶財 命底來去共伊看覓 好命歹命就會知
阿君講欲共伊看命 就報出生予官廳 天光卯時正正正 清清楚楚報予兄
命看明白回轉到 才袂害娘聽候哥 咱囝的命正實好 那帶水關別項無
聽哥汝說這層事 毋知是實抑是虛 咱囝水邊毋通去 就照先生的命書
人我正實𠢕放種 咱囝財庫帶雙層 後日大漢有路用 的確比我較才情
（病子歌7 完）
*臺史博知音分享會解讀，參考歌仔冊《最新病子歌》(玉珍書局印製發行,1932 年 4 月印刷出版)