歌詞/全文

正月病囝在心內 毋敢講出驚人知 看見物件逐項愛 恬恬差哥買入來
欲央人買驚歹勢 問娘思食啥物的 物件買甲規大个 愛食你就家己提
二月病囝人愛睏 三頓糜飯無愛吞 愛食白糖泡藕粉 差兄去買一角銀
一碗藕粉泡滇滇 白糖趕緊參較甜 問娘今是啥物病 面色敢會遮爾青
三月病囝人喙凊 跤痠手軟烏暗眩 酸澀買甲規內面 思食樹莓鹹七珍
我緊行倚共娘問 面色敢會遮青黃 專食酸澀無食飯 想著心頭替娘痠
四月病囝人畏寒 趕緊棉裘提來幔 專專愛呸白泡瀾 愛食竹筍𤉙蟶乾
看娘暝日連連睏 糜飯半喙都袂吞 欲食蟶乾煮竹筍 差人趕緊買來𤉙
五月病囝人烏暗 全呸喙瀾無咳痰 欲食無物來啖糝 欲食仙楂共柚柑
看娘消瘦佮落肉 喙瀾呸甲規土跤 袂食糜飯干焦飽 (干)焦愛柚柑佮仙楂

（病子歌1 完）
*臺史博知音分享會解讀，參考歌仔冊《最新病子歌》(玉珍書局印製發行,1932 年 4 月印刷出版)