歌詞/全文

樵夫：〔唱〕查某看牛誠罕有 會唸歌詩遮健丟 果然生做真好樣 可惜出世在山場
牧童姐：〔唱〕好樣歹樣免汝管 剉柴毋剉共阮煩 查某看牛汝免亂 加講就會起禍端。
樵夫：哎呀小娘囝，你哪遐呢歹咧，總無攏袂值得分會咧。
牧童姐：汝做汝，我做我，剉柴毋剉欲佮阮看牛的擋鬥久是毋是？我牛若放咧據在伊去就會飽，汝柴若毋剉來加講話，到暗無柴通好轉去你就會害咧。
樵夫：〔唱〕無柴通轉無要緊 為娘無柴有原因 因為貪看娘的面 才會柴剉無半絪。
牧童姐：〔唱〕抾柴的人講憨話 佮人亂講喙飛飛 汝是大人的年歲 毋通亂講袂曉衰。
樵夫：毋是我咧亂亂講，查某人看牛確有較稀罕，敢若樹林內咧發仙丹，敢若坑仔底揣著素心蘭。
牧童姐：抾柴兄，我問你咧。你抾柴人按怎樣會有新的內衫遐白啊？
樵夫：〔唱〕知你欲來遮看牛 透暝無睏整身軀 小弟一層心內事 毋敢講出心挐挐。
牧童姐：〔唱〕阮欲看牛過別位 無愛佮汝講規堆 看牛剉柴免仝位 男女作伙有是非。
樵夫：哎呀，查某官，你哪遐呢棄嫌咧？在通佇當時有這个好的機會通來遮講話，加講幾句仔嘛較長歲壽咧。
牧童姐：無愛佮你講予你去早死喔。
樵夫：真歹心、真歹心。查某官較慢去的啦！小寡參詳咧！
牧童姐：有啥物代誌通好參詳？阮看牛若無關心，牛若夆偷牽去你就會害咧。
樵夫：牛也就看，查某官也就看。
牧童姐：看佗一塊？
樵夫：看你彼塊。
牧童姐：死囡仔，遮無懸低。
樵夫：啥物有懸低抑無懸低，徛起來就欲到兩寸。
牧童姐：鏨頭咧！
樵夫：有影無，鏨頭起來減一寸。
牧童姐：無禮！
樵夫：無禮閣補。
牧童姐：哎喲今仔日咧犯著鬼無愛佮你講喔！
樵夫：〔唱〕哎喲 肥白好體得人疼 目神喙勢咧害兄 害我神神徛定定 想欲離開跤袂行。

（樵牧閑話下 完）
*臺史博知音分享會解讀