歌詞/全文

牧童：〔唱〕山間光景好𨑨迌 看牛歇睏唱山歌 山歌唱了草埔倒 較贏街頂做大哥。
牧童：抾柴兄，你哪欲抾柴抾甲按呢汗哪流咧？你嘛歇睏，來樹跤小清心下咧。
樵夫：〔唱〕抾柴實在真歹命 清睏無柴通好燃 歹命來做抾柴囝 看牛山間的老爹。
牧童：〔唱〕看牛實在真艱苦 哪通這款來稱呼 像你剉柴好地步 一擔賣咧欲成箍。
樵夫：〔唱〕看牛實在誠閒身 中午樹跤好安眠 精神對牛騎緊緊 清心遊賞擔頭輕。
牧童：哎喲，加話免講。阮頭殼又閣疼起來咧。
樵夫：怎樣啊？
牧童：〔唱〕哥哥你攏毋知代 遮久寒熱逐日來 人講有鬼在腹內 按怎作祟我毋知。
樵夫：〔唱〕亂講無驚（夆）笑半死 古早的話無合時 藥粉來食隨時離 寒熱緊去請西醫。
牧童：哎喲，真艱苦，明仔載欲叫阮大姐來替看。
樵夫：哎好——牛騎咧做伊去，講欲叫一大姐來替看牛，𪜶大姐、𪜶大姐……哎好，這個牧童已經有十四五歲矣咧，𪜶大姐至少也有……哎好，這個牧童生作遮清標，𪜶大姐或者較媠也無的確咧。今我就加剉幾擔柴來去街頂賣錢，來做明仔載的代誌。五仙錢仔來去剃頭，一百錢仔來去買一領新的內衫，另外買一蕊會插得的花。哎呀，代誌哪想哪通，昏暗毋知睏會當去抑袂？

樵夫妹：哎喲，老母仔，二哥今仔日哪有錢通好剃頭剃甲遐白。
樵夫母：死囡仔咧，你哪有錢通好剃頭啊？
樵夫：明仔載崁仔跤聖王公廟有戲咧，所以阮加剉幾擔柴來去街頂賣錢來剃頭。
樵夫母：喔，按呢也是好。
樵夫：今這領新的內衫我就緊收予好。毋通予阮小妹仔共阮阿母仔看著。哎呀，一暗毋知睏會到天光抑袂咧。我這領新的內衫毋知風共我飛去抑袂。

牧童姐：我的老母講我大漢矣，叫我毋通替阮小弟去看牛，猶毋過厝內就無查甫人，毋去欲叫牛去予餓死抑毋是？唉，阮就毋捌來這個山間看牛，今仔日山頂的風真正咧冷。
牧童姐：〔唱〕滿山樹木滿山青 鳥仔遐濟亂亂啼 山花開甲逐位是 山頂有雲雲接天。

（樵牧閑話上 完）
*臺史博知音分享會解讀