歌詞/全文

〔麗秀唱〈自由船〉〕 自由船自由船，得意身難分，做若會死亦無忍，只要保青春，汝若手酸來休息，換我出一軍，不怕波浪按怎滾，也划自由船。
清俊：妹妹，這馬咱兩个咧做陣你想按怎？
麗秀：作暗你欲轉去的時，我就想真閣無望，佳哉今仔日會當通共你鬥陣，親像坐在這款的自由船，我是感覺真正爽快咧。
素蘭：小姐，今欲按怎樣咧？老頭家自己主張金錢，將你也視作金錢的主意，你的親事乎，欲配東北油行的頭家了。若無緊想法度是袂用得啦！
麗秀：哥哥，今欲按怎咧？咱兩个煞就來分離了。
清俊：啥物？這款薄情的人，有真心的戀愛煞咧驚金錢的魔力是毋？好，從今以後你共我毋免相插啦，但是妳就看咧，明年的今仔日，或者後年的今仔日、十年後的今仔日的昏暗，我這个清俊會用我的目屎，來掩著月光的烏暗，予你知影這男子的志氣我才甘願。
麗秀：哥哥，毋通受氣，既然你共我是袂離開的者，不如來去綴我的阿爹商量好毋？
清俊：若是會用蓋好，來去。
頭家：哼哼，妳轉來了，來來來。
麗秀：阿爹，有啥物代誌咧？
頭家：婚姻既定的查某囡仔共查甫人是佇咧做陣怎樣的？
麗秀：爹爹，我的親事我想欲來解消啦！你敢知影你的查某囝的生成是啥物款的心情咧，我若無伊清俊絕對毋嫁了。爹爹，孤前賰你你賰我一人，我若無嫁啥物人欲哪有通攢後事咧？
頭家：若假是按呢生，清俊，只要你成功的日子，我的查某囝才嫁你啦。
清俊：感謝，好，我這來欲拍拼來達成我的目的，妹妹，我今就來去拍拼啦，你就期待我咧。
麗秀：哥哥，好，我的確來等你啦，無論三年抑是八年，我會定定來佇咧等待你轉來啦，哥哥，我真正想欲望了春風咧。
清俊：妹妹，我猶原相信你啦，為著咱兩个將來的幸福，我今也就來去啦，你請。

〔望春風3完〕