歌詞/全文

旁白：探花叢二段。
三姑叔仔：奉啊請！拜請三姑引路尋無停，我引路童子過來奈何橋，奈何橋頭行過了，踏到部落是拜爺亭。踏到部落平波波，踏到部落是好𨑨迌。踏到部落是行過了，十二神兵拜請行，十二神兵亂紛紛，我正是兵馬拜神魂。男人生存在男坑，女人生存在肉坑。男人一生探八字，女人一生探花喜，閣六十甲子來排運。我十二神兵好驚奇，第一生宮人生死。
柑仔官：喔啊…，閣一个厝啦！
三姑叔仔：按呢生喔？上頭先遐共入來ho͘ⁿh！
柑仔官：唉唷…，暗暗暗你知毋？
三姑叔仔：拜啊請！天篷光啊，地篷光啊，祖師為吾發毫光，本師發毫光啊，哪吒太子是發毫光！三姑師是發毫光，發起毫光炎炎光e，發起毫光照生童（seng-tông）。照落陰府第一明宮（bêng-kiong），宮（keng）內光光是分明。
柑仔官：喔啊…，光光光囉！
三姑叔仔：按呢生ho͘ⁿh？
柑仔官：著啦！
三姑叔仔：喔啊…，準若kah遐光，入來共看。上頭間！
柑仔官：好啦！喔啊…，內面誠媠喔！大壽（tōa-siū）閣紅沉沉（âng-tim-tim）喔！喔啊…，誠媠！啊…，彼个橋…，彼个桌腳閣無啥在啦！
三姑叔仔：按呢生ho͘ⁿh？
柑仔官：著啦！
三姑叔仔：桌腳無啥在，你共阿婆仔講ho͘ⁿh！
柑仔官：喔？
三姑叔仔：遮錢予伊，叫伊的時陣桌腳共me7抾予在。
柑仔官：按呢生？阿婆啊！彼个桌腳無啥在，我這錢予你haⁿh，共我小可創創咧！
三姑叔仔：啊he水米菜碗有好好--無？
柑仔官：有喔！逐項都好好好咧！
三姑叔仔：厝內有清氣清氣--無？
柑仔官：清氣清氣！清爽清爽啦！
三姑叔仔：抑有經（kiⁿ）遐蜘蛛絲啥物--無？
柑仔官：無咧！光光光啦！
三姑叔仔：按呢生ho͘ⁿh？遮的說，宮（keng）內毋真正清幽呢？
柑仔官：清幽啦！
三姑叔仔：無來後面看一下花叢咧ho͘ⁿh？
柑仔官：著啦！看花叢！
三姑叔仔：奉啊請！哪吒太子是引同行，顧花童子引同過（kèr），引路童子一路引，𤆬入後面觀看花叢真分明啊，神兵火急如律令。
柑仔官：喔…，閣一叢花遮媠啦！
三姑叔仔：彼叢he啥物花ho͘ⁿh？
柑仔官：菊仔花。
三姑叔仔：菊仔花喔？
柑仔官：著啦！
三姑叔仔：抑有生--無？
柑仔官：喔啊…，一蕊閣一雙啦！閣兩蕊白、一蕊紅！咿？唉唷…，he花腳茹tshiáng-tshiáng，在陽間即會毋成人喔？
三姑叔仔：按呢生？
柑仔官：著啦！
三姑叔仔：你叫阿婆仔來，共吩咐ho͘ⁿh，講遮的錢予伊，叫伊花腳共咱摒摒咧，水沃沃咧ho͘ⁿh！
柑仔官：按呢生喔？阿婆啊，我共你講！遮的花腳，共我小可整頓創創咧，也捾一桶水共我沃沃咧。我遮錢予你啦！
三姑叔仔：摒摒較清幽咧，共吩咐！
柑仔官：喔啊…，按呢看，毋即略仔會看得！真好真好！今我欲轉來去矣！
三姑叔仔：按呢生，欲𤆬路ho͘ⁿh？
柑仔官：著！著！
三姑叔仔：奉啊請！拜啊請！哪吒太子引阮轉啊，引阮回e，拜請弟子虔誠設花宴。就催列位眾神仙，為吾發起哪吒到。此起仙規堆，此起急如雷。我日入落西山顧而回，急急歸，急急轉。急急歸，急急本身到壇前帶金甲，馬到壇前帶金鞍，人到壇前歸金水（súi），虎到壇前入南山，展魂魄顧元寶。
柑仔官：唉唷…，遐呢𤺪？
三姑叔仔：按呢生ho͘ⁿh？
柑仔官：啊！

*探花欉 (下)終
*臺史博知音分享會，依歌詞單解讀修訂