歌詞/全文

旁白：Okeh唱片公司，探花叢頭段。
柚仔姊：阿孝牯啊！
柑仔官：喂！柚仔姊啊！
柚仔姊：喂！
柑仔官：我想講來叫彼个三姑叔仔，來去（khìr）探一下花叢咧lio͘h！
柚仔姊：按呢生嘛好，來去啦！
柑仔官：行喔！
三姑叔仔：唉…，是我三姑叔仔，早起散一下kah欲死矣，也無人倩我觀三姑。
柚仔姐：內面有人佇咧--無？
三姑叔仔：喔？有喔？啥物人？
柚仔姐：阮兩个來啦！
三姑叔仔：喔？柑仔官？柚仔姊？恁今仔日罕得行，欲創啥是毋？
柑仔官：唉唷？想講閒閒啦！欲叫你來觀一下三姑啦！探花叢！
三姑叔仔：按呢生？
柑仔官：著！
三姑叔仔：予來來來！坐咧！坐咧！
柑仔官：坐咧喔？
三姑叔仔：目睭，巾（kun）仔掩咧haⁿh！
柑仔官：喔！
三姑叔仔：（唱）拜啊請！本啊壇符令啊將啊，符寫符書（chir）放孤爿。符令煙化放落海，毫光化著是照天庭。照落陰府閻羅天子殿，手夯桃枝阮綴拜，我認真拍出三條路。三條大路直直去，三條大路直直行。大路透陰府，小路透南營！丁蘭咧叫怹母應，我後人咧叫怹無聽。拜請三姑靈三姑聖（siàⁿ）。拜請！第一出門離草埔，草埔路上草青青，草埔路上是草規平（pîⁿ）。
柑仔官：唉唷？哪暗暗啊？
三姑叔仔：暗是毋？發毫光，連鞭光haⁿh！（唱）拜啊請！天篷光啊，地篷光啊，祖師為吾發毫光e，本師發毫光，哪吒太子是發毫光！發起毫光炎炎光，發起毫光照天堂。
柑仔官：喔…，真光囉！
三姑叔仔：有影--無？
柑仔官：有啦！
三姑叔仔：猶有囡仔來矣--無？
柑仔官：無咧！
三姑叔仔：喔？你看，連鞭來haⁿh！（唱）拜啊請！弟子是虔誠設花宴啊，就催列位眾神仙。吾發起哪吒到，哪吒速速降來臨。
柑仔官：哇…，一个囡仔來矣！
三姑叔仔：做你行haⁿh！（唱）草埔路面行過（kèr）了，陽關此宮（kiong）拜請神，陽關此宮陽關井（iông-koan-chíⁿ）啊，四个查某是排四邊。
柑仔官：喔啊…，查某遮媠咧洗衫啦！
三姑叔仔：做你行！做你行！
柑仔官：喔喔！
三姑叔仔：陽關此宮行過了，來到邊宮（piⁿ-kiong）拜爺亭（pài-iâ-têng）。五龍吐水是…，
柑仔官：Hm̂…，臭gîa-gîa？
三姑叔仔：袂！袂臭！（唱）五龍吐水是欲神宮（sîn-keng），來到邊宮行過了，行到此位刣牛坑（tâi-giû-khiⁿ）。
柑仔官：喔喔？
三姑叔仔：牛相觸喔？（唱）五龍吐水是欲神宮，此位刣牛坑啊！牛將軍啊，馬將軍啊，鵝山（giâ-soaⁿ）邊，引同過啊，我引同行啊，刣牛坑宮行過了，行到是奈何橋。奈何橋頭拜姐亭（pài-chiá-têng）。
柑仔官：唉唷！彼板橋遐長，我毋敢行！
三姑叔仔：袂喔！袂喔！做你行，無要緊！（唱）奈何橋頭奈何橋，行到腳搖手也搖。奈何橋頭白波波e，奈何橋頭好𨑨迌。三姑𤆬你路，路上歹鬼是𤆬你行（kiâⁿ），過來此板奈何橋。一心弟子是虔誠設花宴，就催三清祖離宮（keng），哪吒太子是保同寅（tông-în）。保你路上是祖師行（kiâⁿ），再行此位是孤亭（ko͘-têng），神兵急急如律令。

*探花欉 (上)終
*臺史博知音分享會，依歌詞單解讀修訂