歌詞/全文

親愛的諸君，最近四十年的中間，向來二百外萬的人口，已經超出五百萬了，教育思想的進步也是驚人，連欲入公學校也着入學試驗，米、魚、菓子各種產物，年年增加，致到內地的政治家驚着，煞欲甲咱制限米的出口，確實各方面都有進步。來講一項教育問題，各種學校年年的卒業生不止濟，這是咱大家的阿伯、阿嬸愛子弟有出頭的日子，勤佮儉無惜所費予子弟讀書，大家卒業了後，大部分無工課可做，這是因為怎樣咧？政治上也有原因、環境上也有理由。

咱台灣向來已經有幾百年的文化，擱再受新教育，所養成好的人才毋是無，總是咱大家着愛有十分的實力，才會乎人看有目地，若無志氣、無勇敢的氣魄、無熱心去研究，就會予人看毋起，這點要望大家十分着覺悟。

雖然有好的人才，咱攏無團結，攏無訓練。也是無可訓練、無可團結，各人為着自己小小的利益，無為公共出力的精神，這是咱真大的毛病。諸君愛知影，現在是公家協力的時代，一個人有氣力是無路用，着愛大家協力即做有代誌。

產業經濟是咱生活的根本，各人都着愛斟酌設法、來進展咱經濟上的地步。總是生活態度也着大大改良，有人批評咱是驚死、愛錢、愛虛榮，有這款的缺點，大家着愛改頭換面，應該着培養清新的意氣，涵養咱的趣味，藝術愛普及向上，一切無根據的迷信、無合理的歹風俗，着愛大大改革。咱冠婚葬祭是夯大旗拍大鼓，無路用的費用真濟，是愛張面皮爾爾，全然忘記了本來的意思，大家快快着來實行來廢止。

總講，台灣的進步、台灣的幸福，毋是別人做予咱，大家着抱開拓者的精神，愛有冒險進取的氣慨，也愛有團結協力的觀念，大家盡力出來奮鬥，造成大家的幸福，是我最大的希望。