歌詞/全文

台灣的青年兄弟姊妹，咱台灣將來欲較發達，抑是欲較退步，萬事都掛在咱大家的肩胛頭。若是青年諸君人人有進步的精神，有相當的把握、有實行的勇氣，肯來大家努力拍拚，台灣的將來就真有希望了。所以我對青年諸君抱著真大佮真濟的期待，總是咱大家着愛知影世界的潮流、國內的情形，佮着愛知影咱台灣大家現在的地位，到底是啥物款？大家就怎樣用心、用工努力來做，才會予台灣比今日較進步、較幸福，這點是大大愛講究的所在。

所以我欲講幾句無客氣、確實的話，來喚起大家的關心。台灣古早是一遍平林曠野無開化的土地，到三百年前，西班牙、葡萄牙人來探險，看咱台灣的山水真好，所以稱呼台灣叫做「FORMOSA」，就是美麗島的意思。後來乎荷蘭人佔領幾十年，鄭國姓打台灣、驅逐荷蘭以前，咱祖先就漸漸搬徙來住，鄭氏經過三代，歸了清朝的統治，總是清朝無十分關心來經營，幸得當時台灣的百姓，就是咱祖先，真勇敢、肯向前，用了真濟的苦心、流了真濟的血汗，一面愛防治蕃仔的阻礙，一面愛治防風土病痛，所以各人着家已相佮去努力打拚，才開拓建置現在咱台灣的基礎，這點，大家着愛會記的。

四十年前咱歸日本的版圖，政府盡力來統治經營，現在衛生、教育、產業其他各方面亦真發達，可講是有成功的所在。到底咱大家的生活實在有較豐富無？農村百姓有較快活過日無？社會上、政治上的風氣有較爽快無？這是大家日常親身經驗的所在，我毋免提例來說明，大家的確知影，我真希望大家着愛十分的認識佮覺悟即對。