歌詞/全文

憨个：今毋閣行去？
尪姨：娘媽都行到這个枉死城內啦！看見遮个枉死个逐家閣淚哀哀，一个頭烏面紅雄蓋蓋（hiông-kài-kài），看佇遠遠一个一个來。
桃仔官：按呢哦？若是我丈夫个亡，引過橋來相見啦！若毋是阮丈夫个亡，毋倘來佮阮交纏哦。
尪姨：人枉死城官佇咧講，問看恁丈夫是新死，抑舊亡？
桃仔官：唉唷，我共你講照實啦！阮丈夫頭尾死四十九日。人彼正月十六即過往，算來是新亡啊。你都共觀五形，問伊衫褲看穿幾重，從頭至尾共阮說分明一下。
尪姨：衫褲是麼？
桃仔官：是啦！
尪姨：（唱）三重三閣四重四，五重五啊、六啊重六閣七重七，是恁个亡是毋是？
桃仔官：唉唷？是啦！人形生做啥物款？
尪姨：人形是毋？
桃仔官：是啦！
尪姨：伊个頭毛冷冷，嘴齒𠕇𠕇，目睭吐吐，嘴鬚鬍鬍，身穿一領烏衣佮白布褲，看是抑毋是？
桃仔官：唉唷？免講頭毛嘛冷冷，嘴齒嘛𠕇𠕇，你共伊問看覓咧，風水看葬叨一位，伊會知--無？
尪姨：風水是毋？
桃仔官：是啦！
尪姨：（白）風水是毋？（唱）坐啊，坐東西，看閣看南北，是恁个亡是毋是？
桃仔官：哼？敢遐奇啊？恁共伊聽看覓！風水有人坐東看西，有人坐南看北，哪有人風水坐四角？
李仔姊：唉唷？阿姊仔，你也紲毋知影？唉唷，尪姨嘴，糊瘰瘰(hô͘-lùi-lùi)！
桃仔官：按呢哦？
尪姨：哼！人你也紲毋知彼當時羅經（lô-kiⁿ）反，子午（chú-ngó͘）反子牙（chú-gâ），東西反南北，所以恁丈夫毋即會坐四角。
桃仔官：哼哼，都是按呢哦？我閣問你咧，看你在生之時，幾个親生个囝兒？
尪姨：唉咿？講囝兒，是欲呢(nî)？
桃仔官：按怎？
尪姨：（唱）抑無閣啊一蕊啊連一蕊！
桃仔官：一蕊連一蕊？毋著哦！
尪姨：唉唷？我這陣講詳細！
桃仔官：好囉！
尪姨：（唱）抑無閣一蕊啊連一對！
桃仔官：一蕊連一對？又毋著囉！
尪姨：唉唷，（唱）抑無閣一蕊一雙連一啊對！
桃仔官：Hâⁿ？一蕊一雙連一對？抑毋五个啊？敢遐好命？無甲半个哦！
尪姨：（白）無甲半个都著毋，怎樣？我無按呢講？講起先（唱）也無一蕊一雙連一對。（白）是你聽無詳細！
桃仔官：按呢哦？抑毋，我聽無詳細哦？
李仔姊：唉唷？尪姨會順話尾，你都較細膩咧！
桃仔官：按呢是毋？我閣共伊問較真咧！看你致啥物病過身？
尪姨：唉唷，恁丈夫是為著感冒來所致啦！嘴內不時咳血絲！
桃仔官：按呢毋！
尪姨：藥仔食去毋著味，即害恁丈夫一命死哦！
桃仔官：唉唷！
尪姨：看此號症頭看是毋是？
桃仔官：唉唷…，我一个好丈夫！
尪姨：（唱）彼啊大大著味，拄啊拄拄是哦！
桃仔官：我夫…，你死，我僥倖…
李仔姊：唉唷，今毋倘哭矣！叫伊娘媽共咱斷一个花叢看覓咧！
憨个：這…，這…，這馬真正晏囉，時間都欲到，咱明仔載即閣出壇問看覓！
桃仔官：無，轉來去嗎！

*臺史博知音分享會解讀