歌詞/全文

（白）聽著此久，獻錢來哦！
（唱）娘媽行到草埔路（tsháu-po͘-lō͘），
草埔路上（tsiūⁿ）毋見塗，草埔路上草青青，我都草埔路上（tsiūⁿ）草相纏。
娘媽行過冷水坑（léng-tsúi-khiⁿ），我都冷水坑中冷微微，
冷水坑路上青苔（chhiⁿ-thî），冷水坑中行過了，刣狗坑中再行行。
行到此位刣狗坑（thâi-káu-khiⁿ），狗頭獄卒（ge̍k-chut）欲來討錢，
狗頭獄卒欲交纏，我都恩主馬上獻紙錢。獻錢來、燒紙來，獻錢來燒紙囉，
欲閣路行矣來去矣......。
娘媽閣行過破錢山（phòa-chîⁿ-soaⁿ），好錢原來去納官。歹錢墜落破錢山，
破錢山嶺行過了，我閣奈何橋（nāi-hô-kiô）中再行行。奈何橋頂玉欄杆，
奈何橋腳是白茫茫。橋頭將軍來接引，橋尾土地來扶身。
[我就]牛將軍、馬將軍，獻錢來、燒紙來，獻錢來燒紙囉，欲閣路行矣來去矣......。
奈何橋中行過了，仙人市（sian-jîn-chhī）頭閣再行。仙人市頭鬧嘈嘈，
我都仙人市尾好𨑨迌。倒爿原來是酒店，我都正爿原來是地方。
地方酒店你也無問，也有一人相借問。大路通通透天去，小路通通透獄城。
三步都變做兩步走，兩步閣變做一步行。娘媽行到枉死城（óng-sí-siâⁿ）囉，
看著枉死真正驚哦，枉死遐濟淚哀哀，爺差小鬼兩爿排，我都獻錢來、燒紙來，獻錢來燒紙囉，放魂來矣去矣。

*臺史博知音分享會解讀