歌詞/全文

桃仔官：唉唷？恁逐家靜靜聽我說起，我是桃仔官，我來招阮彼个李仔姊哦。
李仔姊：「喂！欲創啥物代誌咧？」
桃仔官：「唉唷？你也毋知？恁王萊哥仔此幾年造化敢毋是，講含做生理都無趁錢！交朋友都無仁義，甘蔗賣佮變成竹仔枝｛乾掉个竹子｝，蚵干賣佮變豆豉（sīⁿ）！致了一个暗毿（àm-sàm）病啦！嘴內不時都咳血絲，請（tshiànn）彼个王先生，唉…，藥方共人開去毋著味，害阮王萊哥食一下性命煞歸陰司。」
李仔姊：「有影--無？值時咧？抑我都也毋知影？」
桃仔官：「拄即今仔日是清明（chhiⁿ-miâ）个日子啦！欲共阮丈夫問尪姨（ang-î）。講欲招李仔姊，咱鬥陣來去啦！」
李仔姊：「哦？抑你香燭米款齊備--無？」
桃仔官：「唉唷，款好矣喏！」
李仔姊：「若kah是按呢，欲去（khìr）都來去ko！」
桃仔官：「來去ko！」
「咱是直透行，閣直透走。走來到儑个（gām--ê）門跤口矣啦！抵著儑个徛佇he戶橂頭（hō͘-tēng-thâu）啦！唉唷，狗屎儑个啊！」
憨个：「啥貨？」
桃仔官：「恁阿娘有佇咧--無？」
憨个：「恁…，恁…，欲創…，啥代？」
桃仔官：「唉唷…，你也毋知？今仔日是清明个日子啦！叫恁阿娘出來，我欲予伊問尪姨啦！」
憨个：「哦？哦？哦？恁…，兩个小踮咧遐𥩴（tshāi），我…，我…，我入來內面問看覓咧！」
桃仔官：「緊去（khìr）哦！」
憨个：「阿…，阿…，阿娘啊！」
尪姨：「喂！」
憨个：「外面有兩个查某囡仔嬰啦，都欲來叫你去問尪姨啦！」
尪姨：「唉唷？狗屎儑仔鬼你咧！你也煞袂曉想看覓，咱從彼當時番仔反｛一般指日本統治台灣个開始｝，近來此孔錢都毋捌賺（tsuán）。抑若會曉毋免共人問（mūi），咱遮無一頓尪姨飯（pūiⁿ），你也煞袂曉--个？」
桃仔官：「唉唷…，人阮錢大幅（pak），米大升（tsin），按怎毋趁，哪下咧予散？」
憨个：「啊…，有影都著！此馬若一下買，都食咧到明（môa）年冬尾（bóe）。安…，安娘，你嘛看阮兩个兄弟仔跋輸筊，一寡錢輸了了。安娘，你嘛共伊允（ún），趁淡薄仔予阮兩个兄弟仔做筊本。」
尪姨：「唉唷？死鬼囡仔哩咧！唉唷…，我這毋，你強強欲？抑無，嘛是好，恁阿娘來遮趁--个！恁阿娘个跤帛（kha-pe̍h）｛裹腳布｝、膝褲（sek-khò͘）來提予我穿。」
憨个：「安…，安娘！你跤帛、膝褲掛佇叨仔一位？」
尪姨：「嘿…，這死鬼仔哩！你也紲毋知影此幾日仔落大雨烏陰天，恁阿娘个跤帛夾（khoeh）佇咧煙筒邊。遮久攏無孔（khang），恁阿娘个跤帛、膝褲是下咧佛桌頂做香筒。」
憨个：「安…，安娘！你真慼噁（tshik-ò），對灶君公無禮數！」
尪姨：「加話毋免講！死鬼仔，你緊共我置壇（tì-tôaⁿ）請神，來共我發毫光。」

*臺史博知音分享會解讀