歌詞/全文

莊丁： 哈哈！逐家啊，三姑爺來了！今請入來奉茶！眾人閣等你一个！請姑爺入內喔！
三女婿：毋免請！毋免請！我會行！牽手的，行！讓你來去haⁿh！啊…，頭戴氈帽樂大笑，身穿唐衫是紅khiauh-khiauh。手夯拐仔是拐蹺，腳穿皮鞋是李拐蹺啊！李拐蹺！唉唷…，我欲入廳堂，唐衫紲穿傷長！伸腳跋一下倒頭紲去舂著門，摃倒轉閣跨著塘。四腳向上天，雙腳伸長長！
莊丁： 哼？戇的，今毋起來，講拚中央啦？唉咿？三姑爺！三位的姑爺攏到矣，請老員外出來喔！今就拜壽！逐家啊！
眾人： 喂!
莊丁： 時到囉！大主婢喔，伸長長出來孝啊！燒金放炮喔！
〔鞭炮聲〕
莊丁： 鼓吹閣歕去喔！
〔八音鼓吹聲〕
莊丁： 代先請大姑爺拜壽喔！
大姑爺：一拜泰山久年長，如山如竹如平常。二拜岳父壽樂重，三拜岳母福無疆。
莊丁： 大姑爺拜好矣，今請二姑爺來拜啊！
二女婿：吾高向陽山，四時放廳堂。賜果養廉時，滿面富無藏！
莊丁： 啊？二姑爺這種的做官啦，講這號官話ko。今二姑爺拜了囉，請三姑爺來拜喔！
三女婿：好，來拜我就來拜！阿爹來拜壽，父母做大壽。今仔日做正好，欲行毋免佑。如今放大壽，閣兩粒的文旦柚！
莊丁： 啊？三姑爺拜壽紲毋拜壽，講啥物文旦柚啦！閣拜啦！
三女婿：哈哈，閣拜我就閣拜！丈人請囝婿，有影一下來，雜麵阮無愛！
三女兒：啊？嫁佮你這欲替人死，猶敢數想阮大姊？悾氣的！
三女婿：喂？
三女兒：半路恁牽手教你彼，有影你袂記得矣是毋？
三女婿：哈哈！有影有影！一拜丈人壽無疆，二拜丈姆好樂暢，福如東海啊…福如東海啊…哇…今就害矣，紲袂記--的！福如東海啊…，大丈人啊，便所今佇叨？人我就咧驚屎！
莊丁： 哈哈！這个三姑爺紲誠䆀，四句講袂來，見笑紲講欲假放屎啦！哈哈…。

〔呆婿拜壽下 完〕
*陳龍廷、臺史博知音分享會解讀