歌詞/全文

三女婿：哈哈，阮彼老丈人歲頭食到六十一，這馬就欲做大生日！有影今仔日閒閒無做穡，來去拜壽較條直！哇…，我是拴咧物件誠濟項，代先拜丈人。厝邊隔壁就來鬥相仝喔，欲請扛轎轎仔工。這禮物我排起誠濟色欲共阮彼丈人用鬥色，這馬是欲講彼號黃金色，有影來去大街揀紅燈。
三女兒：唉唷，夭壽短命，你揀啥物紅燈？
三女婿：也紲毋知影紅綾綾，敢毋是紅龍燈？
三女兒：嫁佮你這个誠夭壽喔！也袂曉講做生日用大壽？
三女婿：哈哈哈，大壽你就去大壽，生成挖麵線，林投帽，戴去誠好看。安某的！」[喂] 時間就毋通遷傷晏喔！
三女兒：悾氣的，今來去喔！
三女婿：行喔！對對兄的！
轎夫： 行！來去喔！
三女婿：行喔！恁父騎馬你坐轎，物件捾出門軟荍荍，規陣緊行hē-hē趒，牽手的啊！ [喂]
三女婿：銅管仔吊一个轎內通放尿喔！
三女兒：唉唷，天下短命！三八閣愛插嘴喔！我若無共你交代啊，你現去就現漏氣喔！悾氣的！[喂] 來咧！
三女婿：喔喔？來，我就來！好好，你吩咐！阮牽手媠抹抹，白抹抹，踮咧轎內一直喝，目尾閣再誠𠢕割，害怹父腳後筋piak-piak掣！
三女兒：叫你來，你毋來喔？
三女婿：來，我就來！唉唷…，阮某坐佇咧大轎內，目箭閣共我抵出來。抵著馬險徛袂在，害我險險倒頭栽！嘻嘻…，牽手--的，叫恁尪欲創啥孔？
三女兒：我共你講！[喔喔]
三女兒：今仔日阮老父做大生日！[哼]
三女兒：好代誌！[哼]
三女兒：你是毋通展悾氣喔！[哼]
三女兒：歹話毋通講！[喔]
三女兒：毋通佯不懂！[哼]
三女兒：會曉偷教，抑袂曉？
三女婿：哈哈！我上蓋會，人我嘛會曉講好話！
三女兒：拜來我我看咧，就愛拜百二拜喔！
三女婿：喔來，我拜你看！一拜丈人老康健，二拜丈姆倒少年，三拜囡仔大細腎，四拜拜佮去予伊拖屎鰱喔！
三女兒：唉唷…，拖屎鰱啦！毋是按呢生啦！
三女婿：喔？無就按怎？
三女兒：我教你啦！[喔]
三女兒：雙腳疊齊！[雙腳疊齊]
三女兒：頭殼犁犁！[頭殼犁犁]
三女兒：一拜天！[一拜天]
三女兒：二拜地！[二拜地]
三女兒：二三拜！[二三拜]
三女兒：講好話！[講好話]
三女兒：丈人丈姆是懸歲 [丈人丈姆是懸歲]
三女兒：富貴同全！[富貴同全]
三女兒：閤家平安！[閤家平安]
三女兒：福如東海！[福如東海]
三女兒：壽比南山！[壽比南山]
三女兒：會記得抑袂？講一下我聽咧！
三女婿：哈哈！三兩句仔，免學我嘛會曉得，也紲袂曉講富貴同全！[對咧] 猶亦我袂曉雞腿肉丸！
三女兒：剉屎鰱喔！知你欲孝孤，無看你身軀若肉丸
三女婿：唉啊，免學啦！時到即時當！到位囉，囥咧遮！
轎夫：喔喔？
三女婿：逐家歇睏食薰！
轎夫：歇睏！歇睏！
三女婿：放尿伸勻！牽手--的！[喂~]
三女婿：落轎喔！我欲落馬！入來內面共你顧馬。

〔呆婿拜壽1 完〕
*陳龍廷、臺史博知音分享會解讀