歌詞/全文

口白：汪小蓮知影慧英離開伊家庭拍算身軀邊無錢，刁工共𤆬放咧旅館約束伊講半點鐘就欲來，而不知時間經過真緊，一點鐘又閣再一點鐘猶無倒轉來。
〔音樂〕
慧英：嗯？時間過遮久，安怎猶袂倒轉來？事辦猶袂清楚，我也無法去別位。
口白：沒偌久旅館的人入來
員工：啊，小姐，汪先生講毋來。
慧英：啊？啥物？你講啥物？
員工：彼汪先生講毋來矣啦。講今仔日旅館錢欲提過來清。
慧英：hannh？
口白：時間真緊直直過，這个時陣的慧英已經是絕望。楊七姑佇外面看見慧英現在困苦的悲傷，也忍不住同情的目屎那流才入來。
〔音樂〕
慧英：啊，妳是啥物人妳家己入來？
七姑：我佇外面看見妳的經過已經六點鐘囉，因為妳的現在就是我早前仝一款的淪落。
啊，妳毋免聽候囉，妳所當著的人喔，就是破壞人的貞節，諞(pian2)著人的金錢的拆白黨。
慧英：啊？拆白黨是毋？
七姑：是，早前我也受著伊的拍騙，錢予提真濟去閣予放擲捒。
慧英：啊，我反悔真正遲囉，我的身軀已經是任洗不清的女子囉。我有啥物面目佇世間，啊。我不如來去自盡。
七姑：啊啊，且、且慢咧。妳毋通死，死也無路用，不如是倒轉去較好。
慧英：啊，我今有厝袂得倒轉來，無死我也欲來去出家啦。叫我殘缺的生涯，目睭毋看世間的男子、一切啦。啊，我真感激，我真感激。
口白：可憐的閨女，被著人所拐騙，致使墜落，行到這款的末路袂通佮人領悟世間的幸福，啊，可憐的閨女啊。
〔音樂〕
口白：現在青年男女啊，佇咧身邊不管時就有惡魔這類誘拐的手爪。若欲親近你啦，你若無真正的把握，愛情是啥物啊？一旦失足，一日成千古恨。上海，可憐的閨女。

（可憐的閨女 其四 完）