歌詞/全文

〔音樂〕
慧英：啊，你是學生，按怎我常常看見你出來外面？
小蓮：啊，阮大學的教授，無拘束學生，所以阮會通自由。
慧英：汪先生，今日的雨遐大呢，嘛看見你徛佇樓跤，真歹勢你知影無？
小蓮：啊，女士，因為我咧思念著喔，因為我咧愛妳，是心肝太熱所以毋知雨水的冷。
啊，沈女士，我有數不盡忍不住的話想欲對妳講，我實在真……真咧……愛著妳妳知影？
慧英：汪先生，你對我的舉動行為我也是知，人是感情的動物，ＯＯＯ我對你也是……。
小蓮：啊，沈女士，我亦有真濟話想欲對妳發表，請妳明仔載做陣來去食暗頓好毋？
慧英：毋是毋好，我今仔日干焦講欲買物件，明仔載才佮你做陣去。
口白：這對正值豐盛的青年男女，約束著相會的期間佮場所，猶原才分開倒轉去。有一日，兩个又閣佇旅館講話的時陣，突然間一下。
某男：汪先生啊，你真害人，我四界佇咧揣你你知無？佳哉人共我講我才知影。
口白：慧英閃佇面後聽見人客佮小蓮咧講話。
小蓮：怎樣咧？
某男：是咧，你煞袂記得咧，你叫我揣金水（也可以講錢水　現金流的意思）喔，明仔載就欲一千箍予人，透早欲挃啦。
慧英：嗯．．．．．．
小蓮：好，若是按呢，明仔暗我來揣你，我才提予你。
口白：人客出去了後，小蓮真煩惱的款勢，無言無語。慧英頭尾話攏有聽入才問伊。
〔音樂〕
慧英：汪先生，你煩惱啥物事咧？
小蓮：慧英，我失禮，ＯＯＯ倒轉來。
慧英：嗯？小蓮，你有啥物事怎樣敢無照實對我講。你佮我現在是難解難分，相愛的人何必著隱瞞，你講。
小蓮：慧英，我照實對妳講喔，我一方面佇外讀書以外，一方面也做淡薄的生理，為著金水，明仔載愛有一千箍。
慧英：小蓮，小可仔錢銀何必就欲對別人借？明仔載我才提予你。
小蓮：啥物？我共妳借錢？按呢抑好？毋通。
慧英：無要緊，你我已是相愛，是家己的人嘛。錢銀事無論。
小蓮：拄仔好、哈哈、はい。
慧英：無要緊，你愛我，我的錢就是你的錢。
口白：隔轉日，一個錢銀入手的時陣，來佇本部的時逐家欲分，首領黃大貴喝毋通，就提去還伊，後擺信用佇大注錢才會好。
小蓮：哈哈哈哈，大貴頭兄，你的智識真好。

（可憐的閨女 其二 完）