歌詞/全文

〔音樂〕
口白：拆白黨員汪小蓮，因為誘拐慧英，詐騙手段提著伊的錢真濟去，彼一日旅館看見伊紮璇石手指。
小蓮：啊，慧英，妳這手指值時買的？
慧英：這是阮老爸永安公司(上海老牌百貨公司)千八買的。
小蓮：喔，真好看呢，嗯，這塊真好，花頭也媠(sui2)，妳剝起來我合看覓咧。
慧英：好。
小蓮：啊哈，我掛猶原好看呢。慧英，借我來去看範喔，我也買一跤，手指的花樣咱兩个相仝，敢若親像我的心肝佮妳的心肝嘛共款。
口白：上海畫報怨恨拆白黨的害人，將小蓮佮慧英密會的新聞有寫真，代誌發表出來。
這號代誌新聞一做，慧英婚約者的老爸叫著媒人來共退婚。自本是頑固舊式的序大人沈玉山非常的受氣。
〔音樂〕
沈玉山：哼，哼，我抑有妳這種序細，去死，妳猶敢做甲這號袂見袂笑的事欲來拖累我，妳真袂見笑。
慧英：爹爹，望你赦免我。
沈玉山：啥物？啥物人是妳的爹爹？無采我予妳讀書，做甲這款敗我門風的事，我毋容允啦，哼、哼。
沈母：毋通受氣囉。
沈玉山：啥物？這嘛全妳這範的。做人的老母教阮查某囝，致使阮查某囝不賢。致使今仔日這款的事。
妳若無妳就綴伊去，哼。哼，叫我是沈玉山的面欲攑佗去啊？哼。
沈母：啊，慧英，今仔日我是妳的老母，也已經無法度通保護妳囉。
慧英：阿母，赦免我咧。
沈母：慧英，妳老爸當咧受氣，我也無法度通保護你囉。
長工：太太啊，不如予慧英去阿哥𪜶兜小閃避，另日老爺若無受氣才予伊轉來。
沈母：慧英，這个時陣我也只有放條活路予妳去走，啊，慧英，我的心肝。
口白：墜入家庭破碎的慧英，在想我有一个忠心可靠的愛人佇咧，無起悲傷。啊！可憐的閨女啊，妳是猶咧眠夢無清醒是毋？有一日，慧英佇路邊看見小蓮坐車一下大聲叫。
〔音樂〕
慧英：小蓮！小蓮！
小蓮：喔，慧英。妳欲去佗？
慧英：小蓮，我去旅館揣你無，中華大學也揣你無你知影無？

（可憐的閨女 其三 完）