歌詞/全文

口白：上海，是東洋第一的繁華都市。佇表面上看起來，是交通的完備，抑是建設的美麗，徛佇東洋文明的極致。對裡底面看起來，當時是罪惡的工場，在上海罪惡之中第一出名者，拆白黨，拆白黨。誘拐良家的婦女，剝奪人的金錢，真不良的團體。一个純良的處女名叫做楊七姑，由拆白黨員汪小蓮誘拐致使墜落。
七姑：啊小蓮，若是咱的事外面一日一日知影，你知影無，你就較早回頭咧。
小蓮：嘿，妳咧驚啥物，做你安心，機會若到，對妳提的錢自然會還妳嘛，放心。
口白：有一日小蓮佇戲台看戲，不久看見著美貌的女子。身穿真好，知是富戶的小姐，戲煞佇外面聽候，看見坐著自動車去伊也綴後面行(讀文音)車去。〔音樂〕知是車內的女子，就是上海大富商沈玉山的查某囝，名叫做沈慧英。

慧英是天真爛漫無知的處女，抑毋知世間的複雜的彎曲。佇戲台裡，坐佇身邊的男子抑綴來，心內感覺已經(有)不可思議的印象。
小蓮看伊車停佇門口，知是沈富戶的所在才轉去。隔轉日，行路來踮佇慧英的門口聽候，看見伊出來坐車就欲出門，寫一張字擲佇車內。
慧英一看「請女士來ＯＯ公司樓頂花園Ｏ講話」小蓮進前來佇花園聽候，無偌久，果然看見慧英來真歡喜。
小蓮：啊，女士，請妳對樓梯入來。
〔音樂〕
口白：慧英來，小蓮就進前捀茶。
小蓮：啊，女士，我自戲台看著妳以來，每日思念妳妳知影毋？每日就想愛閣親近著妳攏無機會，今仔日會得女士妳無棄嫌來，這真是我一生第一幸福的美夢。
慧英：啊，講話遮趣味的，正經共請教咧，你叫做啥物大名咧？
.口白：小蓮想騙人語。
小蓮：我，名叫汪小蓮。中華大學的學生，阮家父佇北京內政部做官，阮老母佇北京，干焦我一个留佇上海留學。
慧英：喔，你是學生是毋？
小蓮：是。

（可憐的閨女 其一 完）