歌詞/全文

算命師：喂！文王籤卜聖卦，籤聖卦定卜卦論命。無事卜卦奉身己，事到臨身卜卦遲。也有人大家卜新婦，也有人姨仔卜姐夫，囡仔來卜好育飼，老大人來卜食百二。生理人來卜大財利，娶親卜日子，查某卜會生啊！
女：哎唷，先生啊。
算命師：喂！
女：我欲予你卜卦啦。
算命師：喔呵呵，你欲卜卦毋nah？
女：是啦。
算命師：嘿，我的籤極聖卦極定，到直矣妳是蹛佇佗位仔著咧徛起，食誰人的水米？
女：我蹛過圳啦，阮翁林土虱啦。
算命師：抑今彼一斤是幾个錢hah？
女：嘿，毋是啦。人是姓林名叫土虱啦。
算命師：喔，姓林名土虱喔。
女：是啦。
算命師：來來來，先生共你卜一下來。
〔籤筒聲〕
算命師：拜請文王周公五代聖賢八卦祖師，八八六十四卦卦卦分明，信女林土虱之妻名叫金魚的敬占一卦。再求外卦。這個，乾字為天，震為雷，坎為水。啊水剋火六爻變動。啊這支是欲卜啥物貴事的ho？
女：哎唷，先生啊也無你頭拄仔佇咧念講查某卜會生。
算命師：喔！你就是欲卜花喜的毋nah？
女：是啦。
算命師：今我給你斷一下乎，攏是按呢生啊斷好妳是無歡喜，啊斷歹無受氣喔。
女：袂啦。
算命師：照這支卦是六爻變動啦，求花喜的確是猶較袂啦，嗯，若欲按呢生仔來共算起來ho算是欠一項。按呢好先生共你鬥相共，啊從來你就有向望啦ho，這是恐驚一款啊𠢕激五仁啊你就費了先生的心神啦。
女：哎唷先生啊作你毋免掛意啦，作你算代阮的代誌。若是共阮鬥創會生是毋，恩情是較大天喔。
算命師：著囉，你若家己講會曉理啊，先生毋就有法度通排比你知無。我共你講ho，明仔下昏啊，你攢淡薄仔彼號雞腿油飯捧來先生遮對註生娘娘遐共你問。
女：ho。
算命師：啊轉來ho，你彼物件你就毋通挃啦，就予先生來配燒酒。
女：好啦。
算命師：這條代誌啊，共我囥在一邊，經久才較會生liah。
女：哎唷，先生啊，總是拜託你未是啊。
算命師：對啦，按呢就會記得無？
女：好啦。
算命師：哎呀，有影就著，也有這款的查某閣乎咱一个共騙，伊閣共「信信信」，亦閣兩角銀予咱現扭。啊明仔下昏也有燒酒油飯通來予先生配燒酒。有影兩角銀緊提起來去交咱老牽手的！

（元宵夜問卜.下 完）
*臺史博知音分享會解讀