歌詞/全文

〔鼓吹樂〕
男：哇，寒單爺來矣寒單爺來矣
〔鼓吹樂〕
男：抑無，牽手的啊，你是咧創啥代，總無定定踮咧房間內。啊無想子弟的鑼鼓聲玲瓏吼，毋管會行至到袂走。也有人大兄牽小弟，也有人小妹仔佮大姐。也有人某佮翁成對閣成雙欲去看花燈，誰人叫你佇咧顧房間？
女：顧？顧你一個落屎症咧。鬧熱我就無興咧。
男：對啦，我也煞毋知？是講像咱翁仔某做到這當時，無囝佮無兒，啊咱嘛佮人來去軁燈跤，到冬尾看有通共人生一下仔膦脬無？
女：哎唷，有影就對。鬧熱阮雖然是袂愛看，阮媽閣愛挃囝。啊你無就等阮換衫咧。
男：哎唷，有影足僥倖喔，等候欲出門才欲想穿。也有影予你氣了面就烏蹛咧窮歸晡。亦無咱本成合房做大人用的啊，彼紅的拍死結衫啦，佮彼个五彩旗啦提提來穿啦。
女：你个死人葛咧你的落屎症旗咧。
男：毋是啦，花絲葛衫啦，佮彼領五色的裙啦。
女：哭爸，好矣啦。
男：啊今房間門無搝來關予好，鎖匙煞共我提提提來鎖啦！
女：行喔！
男：來去閣。
女：喂！喂！
男：啊今是佇咧怎樣？喂若咧娘嬭咧。
女：人毋知啦。
男：有影是啥款？
女：人欲放尿啦。
男：哎唷，鬧熱佇咧嚇嚇趒，總無遮著咧放尿，啊行到這遠來全全你的詼諧，緊轉去放才閣來啊。
女：你就等阮喔。
男：啊好啦。
女：行喔，今來去喔。
男：啊今你是在創啥潲，定定站牢牢？
女：哎！小等咧啦。
男：我才毋咧膏膏纏，行到厝毋就歸半暝。
女：老的，你來看覓咧，哎唷你有看無？彼跤四角箱子內ho，也有彼號騎馬的也有攑刀的喔，也閣一仙啊一仙啊一直出來喔，夭壽甲死咧。啊若我就共算看覓咧乎閣一百〇八仙你知影無？啊閣一直出來無講喔。
男：啊哈哈，彼著足捷冤枉，啊走馬仔燈也煞袂曉通好講，干焦彼幾仙的尪仔佇遐玲玲瑯瑯遨啦。
女：哈哈哎唷，人我毋知影叫是伊一直出來lio。
男：抑無牽手的，
女：喂。
男：今時間也遐爾晚，毋通閣再看，也好通轉來去囉。
女：行喔，轉來去喔。

（元宵夜問卜上 完）
*臺史博知音分享會解讀