臺灣音聲一百年網站

全文

唸白全文 01　　聘請先生眾社會　　四海兄弟初交陪， 　　　女士嬸姆佮老輩　　且聽慘局的問題， 02　　了人家財真徹底　　猶有庄民與市街， 　　　男女損失非常多　　臺灣未有這初回。 03　　政府新聞隨時會　　寫真急告滿庄街， 　　　想著這款大慘底　　看著會恍頭殼皮， 04　　官廳也起臨檢地　　實地調查幾落回， 　　　通人看著袂講話　　做伊頭殼煞頓頹。 05　　政府非常疼百姓　　隨時賑濟誠公平， 　　　這款淒慘的事情　　昭和是拄好十年， 06　　新曆四月廿一早　　拄拄六點無精差， 　　　地震大厝倒密密　　官廳隨時緊調查。 07　　舊曆正正乙亥年　　三月十九太陽生， 　　　天猶未光彼早起　　大約是才交卯時， 08　　新竹臺中的管內　　為著慘景大震災， 　　　我看這款的厲害　　不才作劇作出來。 09　　臺灣慘死的故代　　小弟名姓報恁知， 　　　我蹛臺北的市內　　姓陳玉安是不才， 10　　是我憨慢聲較醜　　句鬥做較袂得來， 　　　望恁大家相顧愛　　三番之一報恁知。 11　　內埔庄長叫張堪　　一生良善𠢕做人， 　　　為著這擺大地動　　全家死到賰三人， 12　　大厝倒甲裂慘慘　　毋知是廳抑是房， 　　　物件硩甲無半項　　通人塊看都毋甘。 13　　官廳都替伊苦慘　　共伊保護佮請工， 　　　工人物件提去藏　　才用陸軍內地人， 14　　公子留學在東京　　接著電報煞袂行， 　　　真正才能有孝囝　　總督解說予伊聽。 15　　張堪閣一親女兒　　當前都嫁人為妻， 　　　夫妻和好是無比　　尪是才情佮有錢， 16　　幼兒五歲歹育飼　　拄著相命的先生， 　　　算伊命底來所致　　夫妻要離開三月時， 17　　此時尪某才相議　　回轉娘家且安居， 　　　媳婦仔四歲做伊去　　　放彼五歲的幼兒， 18　　可憐三个四條命　　蹛伊外家死不明， 　　　枉費　尪誠本等　　另日月老講予明。 19　　張堪小弟叫張花　　分開出來做助役， 　　　真正好量袂散赤　　厝倒全家來死佇遐。 20　　墩仔腳一戶姓洪　　大厝倒甲空空空， 　　　畜牲牛隻無半項　　一倒全死來廿幾人， 21　　月眉厝倒到無路　　死傷血流滿草埔， 　　　只賰公會堂佮蔗舖　　鐵橋煞斷做三箍。 22　　重傷公醫是一直顧　　藥仔免料共伊糊， 　　　官廳非常的照顧　　臨時搭寮滿草埔， 23　　又閣一間招樂台　　牆倒一半壁煞歪， 　　　第一淒慘可憐代　　墩仔內埔透月眉。 24　　后里神岡十六份　　圳堵外埔清水郡， 　　　歸庄倒甲沖沖滾　　土粉是若火薰， 25　　清水一間醫生館　　祝賀鬧熱請軒團， 　　　眾人蹛甲滿滿滿　　為著地動大錢關。 （陳龍廷、黃裕元 聽打/黃裕元 改寫） 備註： 1.全文由陳龍廷教授協助聽打，內容參考王順隆老師整理的「閩南語俗曲唱本『歌仔冊』全文資料庫」，特此申謝。 2.用字以教育部編纂「臺灣閩南語常用詞辭典」為準，部分用字參用「台文華文線上辭典」。