老青春
作詞
林清月
作曲
文藝部
演唱
青春美
唱片編號
80250-B
關鍵詞
內容描述
陳龍廷、台灣歷史博物館知音分享會 解釋詮釋
【簡介】
濃妝豔抹的四十九歲女子跟男子在鬥嘴。鬥到後來兩人合唱了一段江湖調，最後以勸聽眾朋友要男女合好、要趁年輕及早收斂收心作結。
伴奏
古倫美亞管弦樂
發行編號
80250-B
專輯名稱
發行機構原文名稱：Columbia
出版者
日蓄(古倫美亞)
全文
女：罪過，我來囉！〔鑼鼓點進〕歲頭食甲是四十九，抑是四十九，青春是想欲再回頭。面抹水粉是寸外厚，髻花是險險拍交落，慣用的茶油是浸芳草，頭鬃閣舖甲老老老，胭脂是點甲鼻孔口，目眉閣畫甲頭額頭，身份是激去誠麗斗，相公紲嫌我老猴。王子公孫是一下到，專用的手腕是共怹兜。真正的外頭是蹛海口，眾人的稱呼我喙誠𠢕，彼陣面皮就共伊激予伊厚，慣做彼老闆的老娼頭。老闆的老娼頭喔！呵呵…〔鑼鼓點收〕
男：呵呵…，誠奇！青天白日，你這个老雞母閣咧嘰嘰啼啊？
女：哎喲…，你這个老夭壽短命你！哎喲…，你是目睭敢是咧生黴，才敢講恁祖媽是老雞母？
男：Eh？抑老雞母就有影老雞母，猶閣你也咧佮我咧拍拄啊？
女：你這个死人拄啦！哎喲…，夭壽短命你！予你講著攏攏免，紲毋值甲半銑，你也無聽人咧講，老雞母較去風，你也紲佮恁祖媽佇咧半伨重！
男：嘿嘿，半伨重講半伨重咧，我是予你害甲性命險險去見祖公喔！
女：哎喲…，你這个夭壽短命！你的死人公、無人公啦！哎喲…，死得無水準，講話離喙唇，專專就是佮恁祖媽佇咧激話骨講！
男：Eh？哇…，我無咧嫌你雞漚，你紲咧嫌我真夠啊？
女：哎喲…，恁祖媽是漚罔漚，頂下港去行透透。是無遐隨便欲佮人湊，你知毋？
男：按呢生？
女：著咧！
男：哇…，彼有矣喏！看甲你這號虎豹母，人材才如此，這你就囥咧壁腳邊，予伊生黴喔！
女：彼甲遐衰潲？彼時佮人咧落地寮，當結是像花鮡！哎喲…，相爭的人是共我搝牢牢喔！
男：嘿嘿…，按呢生？我知！我知！講著遐交易，相爭甲無額！這馬佇咧有喙無通食！
女：哎喲…，你這个夭壽短命！看恁祖媽甲遐無目地，講甲少年的時代，毋信你名聲小可共我探聽看覓咧！
男：按呢生？
女：著咧！
男：嘿嘿…，我知！我知！彼你少年誠天胎，激起上囂俳，無錢的人攏總來咧佮你開！
女：甲遐戇？無錢是做毋免摸，我的人客乎，專專就是彼有掌權的，佮彼號大富戶，一擺提著是幾偌千箍，哎喲…，相爭是𤆬我欲去做某。人我坐咧食產，佮收租。
男：哎…，垃圾鬼！啥物坐咧食屎收租？
女：毋是啦！食產佮收租啦！你聽無明！
男：Hò…，按呢食產收租喔？
女：著啦！
男：啊…，哈哈！
