臺灣音聲一百年網站

全文

古倫美亞的曲盤最近真好意思，事實有影毋是虛啦！這是咱明朝的故事，英台最初得欲讀書。 英台心內佇咧拍算，想欲杭州入學堂。試看阮老母毋知欲抑毋？大概敢欲到大門？ 英台十分假注意，今仔日共母你通知，厝內kah無人會捌字，囝兒想欲來去讀書詩。 母親開嘴都共囝問，你愛杭州入學堂，欲此去杭州路真遠，阮是毋甘予囝你出門。 請求母親你此睏予囝去，心肝你放開毋倘酸，我甘願女人假男子，女扮男裝欲讀書。 母親勸囝是仙無倘，咱學中全是查埔人，雞卵密密都有縫，用紙來包火是無彩工。 英台掠話對嘴應，樹身坐正是不怕藤，予囝來去都無要緊，我甘願女子假男人。 毋是恁母咧假明察，啥物仝囝講話是無白賊喔！若予學生來看懸，予人笑咱是大毋值！ 英台隨時都應一聲，勸母你絕對你免驚。囝若kah樹身坐得正，我都毋驚胡蠅蠓仔颺。 唉唷…，囝你咧說都也是，哪使予囝兒來費心機？咱蹛咧厝內都來學針黹，咱查某讀書是欲ni？ 英台聽著紲面慄色，母親說話誠觸德114，我讀書也毋是咧心適，捌字算起來嘛大積德。 英台受氣都綴母仔叫，母親疼囝是真著，咱朝內文武毋是少，敢無查某做王侯？ 我都毋是做官代，實情說予母親知。讀書捌字毋是歹，來往的賬目看會來。 抑你乖乖你都聽母嘴，情理毋免講規堆，厝內咱都猶有倩掌櫃，哪使予囝出外圍？ 母親你真真無情理，赤身哪倘上交椅？若予伊天仙想外意，共咱飽肚咱嘛毋知飢。 是囝你少歲毋知影，做你放心毋免驚。人我頭仔是欲去倩，看伊貪心永毋成。 會貪袂貪對叨看？伊敢有佮咱仝心肝？母你意思看想按怎？我代誌捌捌都免相瞞。 唉唷…，囝你真真吵欲去，kah無聽恁母來勸平，我是驚了你出去毋順事，共囝說實是無說虛。 母親你毋免大聲嚷，好歹咱都暗參詳，這是咱的家事上，查某讀書是姑不將。 囝你真正有大情理，我紲無言詞倘應伊。講著真正不得已，今仔日即著從囝兒。 請求母親著歡喜，我都心肝那想那開脾。憶著讀書捌此幾?仔字，即著佮母佇咧膏膏纏。 毋過一半歡喜一半苦，看囝你怎樣欲變查埔？無想你行路都是查某步，若予人看破欲如何？ 雖然我都是查某枝骨，毋過恁囝做事袂唐突，若予我變裝都看袂出，變做查埔的人物。 母親雙人同歡喜，仝恁列位欲相辭，此站暫且小停止，最後即閣學英台伊。