臺灣音聲一百年網站

全文

大家啊，恁毋通嚇嚇叫，這馬這暫是欲講笑談予恁笑啦！咱人實在毋通學甲像這號款，為這筊來所致ho̍onh，會去害著咱的囝兒。這个都是號做王勝文也，一世人為筊，一寡財產才會破害了了。單生一个查某囝，年歲十九，猶未出嫁，在家內都是研究學問，實在是真感心。毋過出著in這个老父，筊輸著袂得生活，將in查某囝的身份，騙講欲嫁人做某。 甫前一位的地理仙，甫前死某有三月日後，猶未娶。王勝文將這个計，去騙彼个地理仙，對地理仙才佇咧講：「將阮查某囝來嫁你做後。」地理仙「哈哈哈…」得欲笑出，講：「按呢嘛是真相當。毋過恐驚伊你嘴講了，閣袂憑準咧！」。 王勝文講：「若驚無憑準，你袂先過定這三十箍，欲娶你才等八月十五。」 「按呢嘛是妥當！」 隨時提出三十箍，交佇王勝文手裡，欲共王勝文討了一張的領收證。王勝文彼時陣才寫了一張的領收證，佮伊交換這三十箍，順紲錢項提過手，兩个才拜別起行。假是愛跋筊的人，這三十箍都提去跋筊囉！一出海落場輸了了，想甲不得開竅：「啊…，今又閣無錢！好啊，所謂是番薯粉芡鼻啦！順這个機會看有拄好通拄對--無？」。 呵呵…，甫前一位的藥店數櫃，甫前娶著歹某共人離婚有兩三冬，猶未娶。 王勝文聽著這款的風聲：「抑無，袂來娶阮查某囝？」。 「啥貨啊？是有影，抑無影？」 「若驚，你袂先提三十銀仔來過定？我寫甲一張的領收證予你做過信，你等八月十五才來定親！」 「按呢嘛是好！我提！我提！」 隨時提了三十箍，提過手，原原閣走去跋筊啦！彼陣錢一下有，本身就去做筊官，起手都攑著墨賊，通場賠透透，三十箍hò-hò…，紲賠無夠啦！彼陣想著目睭規个輪落來，敢欲哭。 「唉咿…，筊輸，我拄好食下晝！」 甫前來到路裡，搪著一个做田的戇長工，相搪頭啦！看見這个長工手骨提二、三十箍，筊輸心肝起粗，王勝文才開嘴問說： 「長工e，你遮緊欲去叨？」 「無啦！阮頭家寄我三十箍，想欲叫我城內市役所納水租！」 王勝文一聽講：「唉咿？甲遐緊？猶未到期限，欲納等較慢！阮是刁遲欲來尋你，欲講一條好事！」 「啥物好事？」 「我看你家後猶未建置，將阮查某囝欲配你做妻兒。」 這个長工聽著誠歡喜，暢一下險險咬著舌：「聘金偌濟，你毋嘛先講起？」 「免講甲聘金的代誌，這是阮查某囝看你相合意啦！」 「Hânn？恁查某囝看我合意毋？」 「將你三十箍先來過定！ho̍onh，這是娶某正式毋免驚！若誠實按呢生，你轉去才講予恁頭家聽，我住東門外，你等八月十五才來娶啦！」 「hòo，好liah！」