臺灣音聲一百年網站

全文

憨的：今毋閣行去？
尪姨：娘媽都行到此个枉死城內liah！過去遮的枉死的，逐家閣淚哀哀。一个頭烏面紅，雄蓋蓋（hiông-kài-kài），看見遠遠一个一个直直來。
桃仔官：按呢喔？若是我丈夫的亡，引過橋來相見啦！若毋是阮丈夫的亡，毋倘來佮阮交纏喔！
尪姨：人枉死城官佇咧講，問看恁丈夫是新死，抑舊亡？
桃仔官：唉唷，我共你講照實啦！阮丈夫頭尾死四十九日。人he正月十六即過往，算來是新亡喔。你（lír）都共觀五形（ngó͘-hêng），問伊衫褲看穿幾重？從頭至尾（bé）共阮說分明一下。
尪姨：衫褲是毋？
桃仔官：是啦！
尪姨：（唱）三重三koh四a重a四a，五a重a五a、六a重a六koh七重七，是恁的亡是毋是？
桃仔官：唉唷？是啦！人形（lâng-hêng）生做啥物款？
尪姨：人形是毋？
桃仔官：是啦！
尪姨：伊的頭毛冷冷，嘴齒碇碇，目睭吐吐，嘴鬚鬍鬍，身穿一領烏衣佮白布褲，看是抑毋是？
桃仔官：唉唷？免講頭毛嘛冷冷，嘴齒嘛碇碇！你共伊問看覓咧，風水看葬叨一位，伊會知--無？
尪姨：風水是毋？
桃仔官：是啦！
尪姨：風水喔？（唱）坐啊坐東西，看閣看南北，是恁的墓是抑毋是？
桃仔官：哼？Kah遐奇啊？恁共伊聽看覓！風水有人坐東看西，有人坐南看北，哪有一个人風水坐四角？
李仔姊：唉唷？阿姐仔！
桃仔官：喂？
李仔姊：你也紲毋知？唉唷，尪姨嘴，hô͘-lùi-lùi！
桃仔官：按呢喔？
尪姨：哼！人你也紲毋知彼當時羅經（lô-kiⁿ）反，子午（chú-ngó͘）反子牙（chú-gâ），東西反南北，所以恁丈夫的墓毋即會坐四角。
桃仔官：哼哼，都是按呢喔？我閣問你咧，看你在生之時，幾个親生的囝兒？
尪姨：唉？講囝兒，是欲nî？
桃仔官：按怎？
尪姨：（唱）抑無koh一a蕊連a一a蕊！
桃仔官：一蕊連一蕊？毋著喔！
尪姨：唉唷？我此陣聽詳細！
桃仔官：好囉！
尪姨：（唱）抑無koh一a蕊連一a對！
桃仔官：一蕊連一對？又毋著囉！
尪姨：唉唷，（唱）抑無koh一蕊一雙（sang）連一a對！
桃仔官：Hâⁿ？一蕊一雙連一對？抑毋五个啊？Kah遐好命？無kah半个喔！
尪姨：無kah半个都著毋，怎樣？我無按呢講？講起先（唱）也無一蕊一a雙連一對。（白）是你聽無詳細！
桃仔官：按呢喔？抑毋，我聽無詳細喔？
李仔姊：唉唷？尪姨會順話尾（sūn-ōe-bé），你都較細膩咧！
桃仔官：按呢是毋？我閣共伊問較真咧！看你致啥物病過身？
尪姨：唉唷，恁丈夫是為著感冒來所致啦！嘴內不時咳血絲！
桃仔官：按呢毋？
尪姨：藥仔食去毋著味，即害恁丈夫一命死喔！
桃仔官：唉唷！
尪姨：看此號症頭，看是毋是？
桃仔官：唉唷…，我一个好丈夫！
尪姨：（唱）彼（he）啊大大藥味，拄（tû）啊大大死喔！
桃仔官：夫啊…，你死，我僥倖…
李仔姊：唉唷，今毋倘哭矣！叫伊娘媽共咱斷一个花叢看覓咧！
憨的：此…，此…，此馬真正晏囉，時間都欲到，咱明仔載即閣出壇問看覓！
桃仔官：無，轉來去嗎！