臺灣音聲一百年網站

全文

桃仔官：唉唷？恁逐家靜靜聽我說起，我是桃仔官，我來招阮彼个李仔姊喔。
李仔姊：喂！欲創啥物代誌咧？
桃仔官：唉唷？你也毋知？恁王梨哥仔此幾年造！
李仔姊：喔…？
桃仔官：講含做生理都無趁錢！
李仔姊：Eh？
桃仔官：交朋友都無仁義，甘蔗賣kah變成竹仔枝，蚵干賣kah變豆漬（sīⁿ）！
李仔姊：喔？
桃仔官：致了一个暗鬖（àm-sàm）病啦！
李仔姊：Eh？
桃仔官：嘴內不時都咳血絲，倩彼个王先生，唉…，藥方共*人開去毋著味，害阮王梨哥食一下性命煞歸陰司。
李仔姊：有影--無？唉唷…，值時咧？抑我都也毋知影？
桃仔官：唉唷…，拄即今仔日是清明（chhiⁿ-miâ）的日子啦！欲共阮丈夫問尪姨（ang-î）。講欲招李仔姊，咱鬥陣來去啦！
李仔姊：喔？抑你香燭米款齊備--無？
桃仔官：唉唷…，款好矣啦！
李仔姊：若kah是按呢，欲去（khìr）都來去ko！
桃仔官：來去ko！咱是直透行，閣直透走。走來到憨的（gām--ê）怹門腳口矣啦！抵著憨的徛佇he戶碇頭（hō͘-tēng-thâu）啦！
憨的：Ham（哈欠）！
桃仔官：唉唷，狗屎憨的啊！
憨的：啥貨啊？
桃仔官：恁阿娘有佇咧--無？
憨的：恁…，恁…，恁…，欲創…，啥代？
桃仔官：唉唷…，你也毋知？今仔日是清明的日子啦！叫恁阿娘出來，我欲予伊問尪姨啦！
憨的：喔？喔？喔？恁…，兩个小踮咧遐chhāi，我…，我…，我入來內面問看覓咧！
桃仔官：緊去（khìr）喔！
憨的：阿…，阿…，安娘！
尪姨：喂！
憨的：外面有兩个查某囡仔嬰啦，都欲來叫你去問尪姨啦！
尪姨：唉唷？狗屎憨仔，鬼你--的！你也煞袂曉想看覓？咱從（chêng）彼當時番仔反，近來此孔（khang）錢都毋捌賺（choán）。今嘛歇久，毋捌共人問（mūi），咱遮無一頓尪姨飯（pūiⁿ），你也煞袂曉--的？
桃仔官：唉唷…，人阮錢大縛，米大升（chin），按怎毋趁，欲下咧予散？
憨的：啊…，有影都著！此馬若一下買，都食咧到明（môa）年冬尾（bóe）。安…，安娘，你嘛看阮兩个兄弟仔跋輸筊，一寡錢輸了了。安娘，你嘛共怹允（ún），趁淡薄仔予阮兩个兄弟仔做筊本。
尪姨：唉唷？死鬼囡仔你咧！唉唷…，我這毋，你都強強欲？抑無，嘛是好！恁阿娘來遮趁--的！恁阿娘的腳帛（kha-pe̍h）、色褲（sek-khò͘）來提予我穿。
憨的：安…，安娘！你腳帛、色褲khòa佇叨仔一位？
尪姨：嘿…，這死鬼仔哩！你也紲毋知影此幾日仔落大雨烏陰天，恁阿娘的腳帛夾（khoeh）佇煙筒（ian-tâng）邊。遮久攏無孔（khang），恁阿娘的腳帛、色褲是下咧佛桌頂做香筒（hiuⁿ-tâng）啊！
憨的：安…，安娘！你真積惡（chek-ò͘），對灶君公（chàu-kun-kong）無禮數！
尪姨：加話毋免講！死鬼仔，你緊共我致壇（tì-tôaⁿ）請神，倘來共我發毫光。